《宋澤萊新著《天路拾穗》TOJ/台灣字版》

 | | | 轉寄

Tsútê 1：Góa ūisiáⁿmi̍h beh siūsé? _1

作者 Sòng Te̍klâi 2025.11.30

Tē it pō͘, Tshinggī titkiù

Tsútê 1：Góa ūisiáⁿmi̍h beh siūsé? _1
Íngiân：Tsiahê kinggiām lóng huatsing tī 2004 nî Gō͘gue̍h siūsé tsìntsêng, tsit phiⁿ bûntsiuⁿ mā siá tī 2004 nî ê Gō͘gue̍h, bat tingtsài tī "Kàuhōe kongpò".
※ Sìn Iésu sí khì kohua̍h
Góa sī tsi̍tê koktiong lāusu kah Tâioân bûnha̍k tsokka. Tāiiok tī 10 kúi nî tsêng （ingkai sī 1990 nî tsóiū）, kah tsin tsē ài tsheh ê lâng kângkhoán, góa ū tsi̍t pún “sèngking”, thauthau'á siutsông tī thuah’á ni̍h, ūtangsî'á the̍h tshutlâi khòaⁿ, inūi khiàmkhuat kipún ê jīnbat, kantaⁿ tsaiiáⁿ piáubīn, bē bêngpe̍k tshim’ì, inūi ánne ua̍ttho̍k ê sî mā to̍h tsi̍tsut'á to bô tsiuⁿhuat. Ū tsi̍t pái tsin ióngkám kā "sèngking " the̍h lâi ha̍khāu ê tōsu sik, tsē kah tsin sìtsiàⁿ teh ua̍ttho̍k. Góa ê piⁿ'á tsē tsi̍t ūi "tēhng tsūhōe só͘" ê lāusu, i pêngsiông sî mā tsin phahpiàⁿ khòaⁿ “sèngking”, tsheh ia̍h téngbīn ōe kah sòaⁿtiâu móamóa sī, âng n̂g le̍k nâ, huisiông lāujia̍t. I khòaⁿ góa hiahni̍h phahpiàⁿ, tsin tôngtsêng góa, to̍h thánkhisin kòelâi kā góa kóng, “Lí tsiahni̍h iōngkong teh tha̍k “sèngking”, ittēng bat tsin tsē tōlí, m̄koh bat gōa tsē góa bô beh mn̄g lí, góa kantaⁿ mn̄g lí tsi̍tê būntê, khòaⁿ lí ū siáⁿmi̍h ìkiàn; tshiáⁿ mn̄g lí, 'Lí kám siongsìn Iésu sí khì kohua̍h? '" Góa hō͘ i ánne mn̄g, ū tiûtû kúi biótsing, simlāi siūⁿ kóng, góa khòaⁿkòe tsin tsē bînkan sìngióng ê tsheh, mā tátsō tshamsiân kòe, só͘ūi iôngsîn-tshutkhiàu, tsìnji̍p têngthiⁿ ê huatsu̍t pēng bô hō͘ góa kámkak hikî; Iésu sī SiōngTsú, ántsóaⁿ bô huattō͘ kohua̍h? M̄koh bē liáukái i ūisiáⁿmi̍h beh mn̄g góa tsitê būntê, góa tsi̍tbīn sukhó tsi̍tbīn tiûtû hôetap kóng, "Góa …ētàng… siongsìn." M̄koh tī kóng oân ōe hitê sîtsūn, góa huatkiàn lōetsāi ū tshuthiān tsi̍tê ua̍hua̍h Iésu ê hêngiáⁿ, tùi tsiàⁿpêng kàu tòpêng, ná tshintshiūⁿ pàng tiāniáⁿ kiâⁿ kòe, tshaputto beh thiàu kàu góa ê sīkak, góa tōa kiaⁿ tsi̍t tiô, tsaiiáⁿ Iésu iáu tsûntsāi tī tsitê sèkài siōng sī bô thang hoâigî ê, I iáu tī tsitê sèkài siōng, jîtshiáⁿ lī lán bô hn̄g, sûisî lóng ētàng tshuthiān! Tshúāu, góa khòaⁿ “sèngking” to̍h tsuan kéng "Sù Hokim Su" lâi khòaⁿ, góa beh liáukái, Iésu tàuté sī ántsóaⁿ ê tsi̍t tsióng sîn á sī lâng, só͘í ua̍ttho̍k “sèngking” to̍h piàn kah tsin ū tiōngsim. Góa ētàng siongsìn “sèngking” ni̍h Iésu ê ittshè giângí, mā siongsìn Iésu só͘ū ê kîtsik īlêng. Tsia góa só͘ kóng "siongsìn" sī teh tsí "kā tsit kóa lóng bô tiâukiāⁿ ka jīnûi sī tsintsiàⁿ" ê ìsù.
Tongsî góa pēng m̄tsai góa ê hitê hôetap ittēng ē hō͘ góa "tshinggī titkiù", inūi “Lômásu” 10: 9~13 kóng, “Lí nā tshùi ni̍h jīn Iésu tsò Tsú, simlāi siongsìn SiōngTsú kiò I tùi sí ni̍h kohua̍h, to̍h ittēng ē titkiù. Inūi lâng simlāi siongsìn, to̍h ētàng tshinggī, tshùi ni̍h sêngjīn, to̍h ētàng titkiù." Tsitkù ōe íking suatbêng "tshinggī titkiù" ê honghuat, náisī kántan iông’ī kiâⁿ, tsi̍tsut’á to bô sînpì ê tsi̍t tsióng honghuat. Kin'áji̍t ê Kitoktô lóng tsaiiáⁿ "sìn jî titkiù" ê tōlí, m̄koh tsin tsē lâng iáu bô tsùì tio̍h "sìn" siáⁿmi̍h? Ū kóa lâng loān sìn, si̍ttsāi hō͘ góa kiaⁿhiâⁿ giâugî.
Kîsi̍t "sìn" túhó sī sing sìn"Iésu síkhì kohua̍h", liáuāu kohtsài jīn "Iésu tsò KiùTsú" tsit nn̄gê kinpún ê tiōngtiám, he to̍h ēsái titkiù à. Tôngsî, suijiân “Lômásu” kā tsit nn̄gê tiōngtiám hunpia̍t ūi "tshùi ni̍h suanjīn" kah "simlāi siongsìn", m̄koh àntsiàu kinggiām, siōng hó tsit nn̄gê tiōngtiám lóng ētàng "suanjīn". Ōaⁿ kù ōe lâi kóng ̄, lí ingkai tī pa̍tlâng ê bīntsêng ēng tshùi kóng tshut "góa jīn Iésu tsò KiùTsú" kah "góa sìn Iésu síkhì kohua̍h" tsit nn̄g kù ōe. Iûkî "sìn Iésu síkhì kohua̍h" tsitê suanjīn, hō͘ góa tī āulâi ittsài kámkak ū kohua̍h ê tōa lêng kànglîm tī sintsiūⁿ, sinsim jú lâi jú pêngan hílo̍k. Jîtshiáⁿ "Iésu síkhì kohua̍h" tsitê kàugī ingkai sī "Sù Hokim Su" siōng tsákî ê lōeiông, lán tùi “Sùtô͘ Hêngtoān” kah Páulô só͘ lâu lo̍h lâi ê susìn tiong ētàng tit tio̍h ìntsèng, tng tsákî ê kàutô͘ khaisí suankàu ê sî, in kàuio̍k sìntô͘ siáⁿmi̍h "hokim” leh? Iā to̍h sī kóng, tongsî iáubōe oântséng ê "Sù Hokim Su", só͘ūi ê "hokim" sī siáⁿmi̍h? Tsíiàu lí siôngsè tshâkhó “sèngking”, to̍h ē huathiān, siōng tsá ê hokim to̍h sī "Iésu kohua̍h tsiūⁿ thiⁿ" tsitê tansûn ê kàugī. Tng ū lâng m̄ sìn ê sî, só͘ū khòaⁿkòe Iésu kohua̍h tsiūⁿ thiⁿ ê bûntô͘ lóng tshutlâi kiàntsèng, kah m̄ sìn ê lâng tiánkhui kiklia̍t ê piānlūn, tsèngbêng Iésu tikkhak íking "kohua̍h tsiūⁿ thiⁿ ̄” loh. Siongsìn ê lâng to̍h sī Kitoktô, m̄ siongsìn ê lâng to̍h iûgoân sī Iûthài kàutô͘, ánne jîí. Tôngsî tsitê kàugī ētàng koànthong kàu sèkài siōng bóe iúkuan "sílâng kohua̍h", "bua̍tji̍t símphòaⁿ" kah "sin thiⁿ sin tē" ê tōlí, kongtshú lán tùi "kṳàu tsinlí" ê tshimkhik jīnti, tùi líkái Kitokkàu ê pangtsān huisiông tōa. Itti̍t kàu tsitmá, tng ū lâng kā Kitokkàu bú kah bō͘khì-tîmtîm, khàukhàu-thîthî ê sî, góa lóng ē kámkak kîkoài, góa tshim tsai Kitokkàu m̄ sī aitō tshiûtshám ê tsongkàu, i ingkai sī tshintshiūⁿ bo̍kio̍k-tshunhong, tiaukhì-tshiotiô ê tsongkàu tsiah tio̍h, tse kîtiong ê goânin túhó sī sìntô͘ khiàmkhuat tùi "kohua̍h tsiūⁿ thiⁿ" ê tshimkhik líkái, bētàng tsaiiáⁿ "kohua̍h tsiūⁿ thiⁿ ̄" tī Kitok sìngióng tiong só͘ tsiàm ê hūnliōng, tsiah tìsú ánne ê kiatkó. Tsúiàu ê sī, "kohua̍h tsiūⁿ thiⁿ ̄" tsiah sī Kitokkàu kàugī ê he̍ksim, tûliáu tsiahê ígōa, Kitokkàu to̍h bētàng huattshut tshànlān ê konghui kah bûkiông ê hílo̍k.