《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 31：Kì góa ê "Sènglêng éngtsū" ê óngsū
作者 Sòng Te̍klâi 2026.10.04
Tsútê 31：Kì góa ê "Sènglêng éngtsū" ê óngsū
Góa ēkìtit 2013 nî（tsìntsêng góa lóng lia̍htsò sī 2104 nî） Gō͘ gue̍h tshe 4, tī Tsionghòa tshīli̍p tô͘sukoán ê iautshiáⁿ hā, tsò tsi̍t tiûⁿ "hoán Hu̍t-sì" iánkáng, têba̍k sī, "Tùi bílē sin sèkài" kàu " hòehi Tâioân ".
Tongsî, hoán Hu̍t-sì ê le̍kliōng íking sênghêng, hōetiûⁿ thiaⁿtsiòng thatthat tīⁿ; m̄koh Má Ingkiú iáu teh tsò tsóngthóng, iónghō͘ Hu̍t-sì kèsio̍k khí ê húnsi khìsè iáu sī huisiông sángsè. To̍h tī góa iánkáng teh beh kiatsok ê sî, tsi̍tê lúsū（āu lâi phòaⁿtoàn ingkai sī tsi̍t ūi tsuangia̍p ê tóngkang）khiā khílâi khònggī, i jīnûi hiānjīm tshītiúⁿ bô ingkai tshiáⁿ góa tsit tsióng hoán Hu̍t-sì ê lâng lâi iánkáng, jîtshiáⁿ pàngsiaⁿ ē tsi̍t kài ê tshītiúⁿ soánkí ê sî, beh hō͘ tshītiúⁿ lo̍ksoán. Tāikhài sī i ê ōe bô thâusū, thāitō͘ ahpà, to̍h ín lâi hoán hu̍t jînsū ê hoánkik, sianghong ngē tú ngē tùitshiâng, hō͘siong bô beh saⁿniū, tshaputto beh phah khí lâi, tiûⁿbīn huisiông hūnloān. Góa huisiông bē sóngkhoài.
Tiongtàu 12 tiám iánkáng kiatsok liáuāu, siū iautshiáⁿ khì kàu Tsionghòa tshī siōng tōa ê tsi̍t king Tsin Iésu Kàuhōe tsia̍h tiongtàu, hit sî túhó sī in ê pò͘tō tāihōe, góa kah tsin tsē ê thoântō kah tiúⁿló tī kâng tsi̍ttè toh tsia̍hpn̄g. Tsia̍hpn̄g liáuāu, tōatīn lâng tsūtsi̍p tī lâuténg ê hiohkhùn sik taptshùikó͘.
Góa sing piáusī góa mā ēhiáu honggiân（tsi̍t tsióng te̍ksû ê ētàng kah sîn kauthong ê lênggí）, in tsi̍t thiaⁿ, lóng huisiông huaⁿhí. Ū tsi̍t ūi tsutshim ê thèhiu tiúⁿló khaisí tùi góa siāukài Tsin Iésu Kàuhōe ê honggiân, jīnûi in ê honggiân siōng ū sînle̍k, kah kîtha ê kàuhōe tsin bôkâng. Góa kantaⁿ tsuansim thiaⁿ i ê siāukài, pēng bô piáusī gōa tsē ìkiàn. Tng tsit ūi tiúⁿló kóng kah khípōng ê sî, hutjiân góa huatkiàn siklāi thianpông ū Sènglêng liûtōng ê iáⁿtsiah, I to̍h thêng tī góa tsiàⁿtshiú pêng thianpông ê kaklo̍h téngbīn, góa tng teh kámkak kîkoài ê sî, to̍h huatkiàn Sènglêng tsin kín lâu ji̍pkhì góa ê hingkhám'á, ū tsi̍t káng loánliû thêng tī simtsōng sìkho͘ûi. Tongsî góa ê simsîn bô tsingtshái, hit káng loánliû khiok hō͘ góa ê sinsim bānbān'á ū unloán ê kámkak sóngkhoài khí lâi. Tsit káng loánliû bô sûisî līkhui góa, itti̍t kàu góa kah in kòpia̍t, kiâⁿ lī Tsin Iésu Kàuhōe, sīmtsì tńglâi Lo̍kkáng ê tshù, I iáu sī tsûntsāi tī góa ê hingkhám'á, huisiông sóngkhoài. Góa púnlâi lia̍htsún tsitê sī góa ê théla̍t hiônghiông kakiông ê hiānsiōng, keh tsi̍t tōaⁿ sîkan tsóng sī ē siausit ê. M̄koh tsi̍t lépài, tsi̍t kògue̍h, tsi̍t nî kòe khì, á sī koh khah kú liáuāu, I iáu sī tsûntsāi tī góa ê hingkhám'á, góa khaisí liáukái tsit káng loánliû tikkhak to̍h sī Sènglêng.
Tse to̍h sī góa ê "Sènglêng éngtsū" ê sùnkan kinggiām. Sènglêng éngtsū tī góa ê singkhu liáuāu, tī tsi̍t nî lāité, tiāⁿtiāⁿ hō͘ góa tshiongmóa hílo̍k, pêngan, jîtshiáⁿ ngē āmkún ê sèngtsêng ū bē tsió ê káipiàn, phîkhì jiûnńg tsin tsē. Tse to̍h sī só͘ūi Sènglêng hō͘ lâng ê "tsio̍h sim piànsêng bah sim" ê khaisí, mā sī kiat Sènglêng kóetsí ê khaituan. M̄koh tsi̍t nî liáuāu, Sènglêng khaisí hiánlō͘ I bôpí sèngkiat ê púnsèng, hoántsiò tshut góa ê púnsiōng, hō͘ góa khaisí tsùì tio̍h kakī ê lōetsāi lâsâm bē khamtit, khòaⁿ tshut tsi̍ttsân-tsi̍ttsân ê tsōeok khûn tī kakī ê sèⁿmiā tiong. Suijiân góa ítsêng mā ū siókhóa thianjiân ê tsènggī hó kiâⁿta̍h, m̄koh góa ithiòng kakī jīnûi liôngsiān sī bô khókhò ê; sūsi̍tsiōng, góa ê púnsèng sī kah'ì hoāntsōe ê. Tùi tsìntsêng kàu tsitmá, só͘ hoān ê tsōeok ēsái kóng sī móa sìkè lóng sī, tsísī góa bô thóngkè i ê sò͘liōng jîí. Só͘ū ê tsōeok lóng ûi tī "bô kongpêⁿ putgī" tsitê te̍ksim, iā to̍h sī kā "súnhāi thajîn" ûi teh ê tiongsim tiám khílâi tiánkhui. Tsiónglūi tsóngkiōng ū Páulô tī Gala̍htia su só͘ kóng ê "kanîm, lâsâm, siâok, pài ngó͘siōng, siâsu̍t, siûhūn, siotseⁿ, khioh hūn, kiksim, kiattóng, huntsing, ītuan, tsi̍ttò͘（ū kò͘koàn tī tsia ū hiongsat nn̄g jī）, tsiútsùi, tîmlûn ê iànse̍k" téngténg ê pháiⁿ si̍pkoàn; tûliáu tse ígōa, iáu ū koh khah tsē bētàng kā lâng kóng ê tsōehêng.
Hutjiânkan, góa bêngpe̍k góa to̍h sī tsōeok ê tsi̍pha̍pthé, kahná tsi̍tê kui singkhu nōakhì seⁿ tshng ê lâng, kahná íking bô io̍h thang i!
Sènglêng khaisí giâmlē khí lâi, sihêng I ê koánkà, puttoān tī góa ê lōetsāi, appik hitê ìài hoāntsōe ê "góa", kìmtsí góa ê tsōehêng, sianghong tiánkhui kiklia̍t tsiàntsing. Sènglêng tsóng sī hiánlō͘ góa só͘ hoān ta̍k tiâu ê tsōe, ài góa tsi̍ttiâu-tsi̍ttiâu jīntsōe, tsi̍ttiâu-tsi̍ttiâu khì káitsèng. Tng góa tékhòng kah siōng līhāi ê sî, tī bînbāng tiong, I ē phahkhui imkan ê mn̂g, hō͘ góa tsham'ú tī tshim nâ ê imkan ni̍h, khòaⁿ hit kóa tsin tsē hoāntsōe ê lâng ê bōng'ápo͘, kéngkò góa tse sī tsionglâi góa khì ê só͘tsāi! Á sī kiâⁿ tī móa sìkè lóng sī tsheⁿ hueh ê kelō͘, hō͘ góa kiaⁿhiâⁿ phi̍hphi̍h tshuah, bētàng tôsiám tit! Góa hām lo̍hkhì bua̍tji̍t símphòaⁿ ê kongkéng ni̍h, tsi̍tlîsi’á ê tsōe lóng ohtit tôsiám SiōngTsú ê gánsîn. Góa tsíhó pī pik ta̍k tiâu jīntsōe, ta̍k tiâu káitsèng, kiatkio̍k tìsú góa ê tsōehêng bānbān kiámtsió. Hitê tsōeok só͘ lúitsik ê "góa" khaisí sitkhì tēpôaⁿ, thèsiú kàu lōetsāi ê tsi̍tê phianphiah kaklo̍h khì, kantaⁿ ētàng beh sí bē tn̄gkhùi, khōngkhōng hián, kahná hong tiong teh beh hua khì ê la̍htsik!
"Sènglêng éngtsū" só͘ tòa lâi ê kiatkó to̍h sī tsōeok ê "lāu góa" kah "Sènglêng" tsi kan ê bô thêng tsiàntsing, pítshú bô huattō͘ pēngtsûn, tshùn thô͘ pit tsing!
──2017, 07, 26 siá tī Lo̍kkáng
