《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 32："SiōngTsú ê lêng tòa tī lín simlāi" sī siáⁿmi̍h ìsù?
作者 Sòng Te̍klâi 2026.10.11
Tsútê 32："SiōngTsú ê lêng tòa tī lín simlāi" sī siáⁿmi̍h ìsù?
Lômá Su 8：9, Páulô kóng, "Nāsī SiōngTsú ê lêng tòa tī lín simlāi, lín to̍h bē sio̍k jio̍kthé, tsiū ánne sio̍k Sènglêng à." Tùi tsit kù ōe, góa bongtshōe tsin tsē pái, m̄koh bô huattō͘ tittio̍h khaktēng ê ìgī. Tsúiáu sī tsitê "sim" jī hō͘ góa kámkak tiûtû kiaⁿhiâⁿ, "sim"tsitê miâsû tī siusûha̍k téngbīn sī tsin oh tēnggī ê.
Ēkha ū nn̄gê káisueh, tsi̍tê bē thong, tsi̍tê biánkióng ē thong. Kású kóng "sim" tsitê jī sī teh tsí "kìik", ánne "SiōngTsú ê lêng tòa tī lín simlāi" to̍h ētàng káisik tsò "SiōngTsú ê lêng tsûntsāi tī lín ê kìik ni̍h", piáubīnsiōng ê ìsù sī huisiông tshingtshó. Pílūn kóng, bó͘ tsi̍t pái, lí khì tshamka te̍khōe, pī koktsè ūmiâ ê thoântōtsiá hōaⁿtshiú tī thâukhak téngbīn, lí hutjiân tsi̍tsî kámsiūtio̍h Sènglêng sûnkhoân liûtsoán tī sinthé ni̍h, saⁿkhatiô-nn̄gkhathiàu, tongtiûⁿ tó tī thô͘kha, tshiùⁿkhí lêngkua. Tāitsì kòeliáu 3 kògue̍h á sī 3 nî, lí iáu sī ētàng kìtiâu tongsî Sènglêng thêngliû tī lí singkhu téng ê kinggiām, lí tsin iông’ī to̍h hôeikkhí tongtsho͘ Sènglêng tī lí singkhu téng só͘ tsò ê SiōngTsú sèngkang, lí póliû Sènglêng ê ìnsiōng tī lí ê "kìik" ni̍h. Ánne, tse to̍h sī "SiōngTsú ê lêng tòa tī lín simlāi" ê tsi̍t tsióng káisueh. M̄koh, lí ittàn tsháṳōng "sim" to̍h sī "kìik" tsitê káisueh, to̍h tsin oh tùi āubīn "Lín to̍h bē sio̍k jio̍kthé, tsiū ánne sio̍k Sènglêng" tsit kù ōe tsò ha̍plí ê líkái. Kám kóng kingkòe koktsè ūmiâ ê thoântōtsiá hōaⁿtshiú tī thâukhak téngbīn, ētàng tshiùⁿ lêngkua ê lâng, kám kóng ta̍k lâng khòtio̍h i tùi Sènglêng ê ê "kìik" to̍h "bô sio̍k jio̍kthé, tsiū ánne sio̍k Sènglêng"? Kám kóng kingkòe koktsè ūmiâ ê thoântōtsiá hōaⁿtshiú tī thâukhak téngbīn, ta̍kê ētàng tshiùⁿ lêngkua ê lâng, khòtio̍h i tùi Sènglêng ê ê "kìik", tsiū ánne oântsoân tsiâⁿsèng（bô sio̍k jio̍kthé）? Góa siūⁿ beh tī sìngióng ê lō͘ ni̍h bô tsiahni̍h sio̍k ê tāitsì! Kàu bo̍ktsêng ûitsí, góa mā bô thiaⁿkòe ū lâng kingkòe bó͘ thoântōtsiá hōaⁿtshiú, khòtio̍h tùi Sènglêng ê "kìik" to̍h oântsoân līkhui siâtsêng suio̍k ê si̍tlē; góa mā m̄ siongsìn sèkan lâng ê "kìik" ū tsiahni̍h tōa ê konglêng thang tshútāi Sènglêng si̍tthé ê úitāi sūkang. Kású ánne, Páulô to̍h bô suiàu tùi Kolîmto Tsiânsu hit tīn ū Sènglêng kingle̍k khiok tsêngio̍k ōngsēng ê sìntô͘ huat tōa siūkhì. Só͘í tī tsia kā "sim" káisik tsò "kìik" sī kóng bē thong!
Kású kóng "sim" tsitê jī sī teh tsí sîsî-khikkhik Sènglêng éngtsū singkhu liáuāu ê "tshâkak á sī kámkak" to̍h píkàu khah sùphòe. Ántsóaⁿ kóng leh? inūi Sènglêng éngtsū tī sin ni̍h sī ētàng kámkak tio̍h ê, tùi Sènglêng lāitsū tī sinthé ê tó tsi̍tê ūitì á sī Sènglêng só͘ hō͘ in ê pêngan hílo̍k, á sī jīntsōe hóikái, sīmtsì sī hō͘ lí éngoán ê sèⁿmiā, lóng ē ū bêngkhak ê tshâkak. Tôngsî tng lí tsoánhiòng sèngkiat ê tāitō tōa pō͘ tsìntsêng ê sî, lí ē kámkak lí tittio̍h kàu taⁿ bô lâng ū ê tsūiû, tse mā sī tsi̍t tsióng tiāⁿtiāⁿ ū ê kámkak. Tsóng kóng tsi̍t kù, tng lí ū tsiahê sîsî-khikkhik Sènglêng éngtsū singkhu liáuāu ê "tshâkak á sī kámkak" liáuāu, lí tsiah ē huathiān kakī tsiâⁿtsò sèngkiat, iā to̍h sī "bô sio̍k jio̍kthé, tsiū ánne sio̍k Sènglêng" à.
Só͘í góa jīnûi kā "SiōngTsú ê lêng tòa tī lín simlāi" káisik tsò "sîsî-khikkhik Sènglêng éngtsū singkhu liáuāu ê tshâkak á sī kámkak" tsiah kóng ē thong!
──2014, 08, 08 tī Lo̍kkáng
