《宋澤萊新著《天路拾穗》TOJ/台灣字版》

 | | | 轉寄

Tsútê 33：Sènglêng lāitsū sī ántsóaⁿ ētàng tsiàniâⁿ siâtsêng suio̍k?

作者 Sòng Te̍klâi 2026.10.18

Tsútê 33：Sènglêng lāitsū sī ántsóaⁿ ētàng tsiàniâⁿ siâtsêng suio̍k?

Tng Sènglêng ētàng kútn̂g tiāⁿtiāⁿ lāitsū tī lán ê hingpak liáuāu, lán tsiah ētàng koh khah tshingtshó théhōe tio̍h lán ê lōetsāi tikkhak sī tsi̍tê bē sè ê thiusiōng khongkan.

Lí thang kā tsitê lōetsāi ê khongkan phìjū tsò tsi̍tê khangsim ê iôngkhì. Kinkì sèngking ê kónghuat, tsitê iôngkhì tī lâng tú seⁿ lo̍h lâi ê sî, to̍h m̄sī oântsoân khangkhang ê. Inūi, i hông pàng lo̍hkhì "lâng pōege̍k SiōngTsú" ê tsitê siâtsêng suio̍k, kinkì sèngking kóng, tse sī lâitsū Atám ê ûithoân, he sī ittshè tsōeok ê iûlâi. Só͘í kóng, Kitokkàu pēng m̄sī tsútiuⁿ lâng kah tsi̍t tiuⁿ pe̍h tsóa kângkhoán lâi kàu sèkài, tī bōe tshut búthai ê sî, lán si̍ttsāi íking ū tsōe ā!

Íāu, lán ūitio̍h jio̍kthé tsêngio̍k ê suiàu, ūitio̍h singtsûn tsingtàu ê suiàu, koh khah tsē ê siâtsêng suio̍k tsìnji̍p tsitê lōetsāi ê iôngkhì, intshú, kanîm, lâsâm, siâok, pài ngó͘siōng, siâsu̍t, siûhūn, tsing kēng, kīhūn, kiksim, kiattóng, huntsing, ītuan, tsi̍ttò͘, hiongsat, tsōe tsiú, tîmlûn ê iànse̍k ……tsiahê sǹg bē tsīn ê siâtsêng suio̍k lóng hunhun tsìnji̍p tsitê iôngkhì lâi à. Tng tsiahê siâtsêng suio̍k tú tsìnji̍p lōetsāi khongkan liáuāu, ē tī lâng ê lōetsāi giâ khí phobûn, sīmtsì piànsêng tōa tsúiéng. Khah bô pānhuat ê lâng, to̍h hō͘ in piànsêng tsi̍t tsióng hêngûi, tī hêngûi tiong tittio̍h siâtsêng suio̍k ê tshutkháu, tsiū ánne hō͘ lōetsāi khongkan ētàng pêngtsēng lo̍h lâi, thò͘ tsi̍t kháu khùi, tìsú tī siophah kah satjîn liáuāu, kèngjiân kóng, "Góa tsiongkîbóe tittio̍h káithuat à!" Só͘í bô pānhuat ê lâng itsing to̍h tshiongmóa hoāntsōe ê kítōng, kiâⁿ tī khâmkhia̍t, tsōeok ê lō͘ ni̍h. Píkàu khah ū pānhuat ê lâng, kiámtshái to̍h ētàng ēng tsúntsat, tsoánî, singhôa ê tsióngtsióng pānhuat, kā in aptsè, so͘thong, siautû, hō͘ in tī sintsiūⁿ bô sánsing phòhoāi sèng ê hêngûi, pībián sánsing singkhu á sī sèⁿmiā ê gûihāi, tsiahê lâng thongsiông ē hông tshingtsò sèngjîn, hiân tsiá, tāitiōnghu, ìsù sī kóng, i m̄sī phó͘thong lâng. Kitoktô píkàu siōng kah tsit nn̄g tsióng lâng bôkâng, tāising, i tsaiiáⁿ khò i kakī sī éngoán bô huattō͘ phiahkhui tsiahê siâtsêng suio̍k. Inūi lán ê lōetsāi éngoán sī tsi̍tê iôngkhì, i bô hông khǹg ji̍pkhì tsitê siâtsêng suio̍k, to̍h khǹg ji̍pkhì hitê; lán ē ohtit tôsiám tshianbān ê siâtsêng suio̍k ê tsìntsū. Kîtshù, tī siâtsêng suio̍k tsìntsū liáuāu, pîn nńgtsiáⁿ ê kakī, éngoán ohtit tsúntsat siâtsêng suio̍k ê kó͘tōng kah íniú, in tsiongkîbóe ē tòaniá góa tsìnji̍p hitê síbông ê sèkài! M̄koh hókatsài, SiōngTsú ūi Kitoktô lâu tsi̍tê honghuat, ētàng siámpī siâtsêng suio̍k ê kongkik; he to̍h sī hō͘ Sènglêng ētàng éngtsū singkhu ê honghuat, hō͘ Kitoktô tôpī tsitê éngoán ê hênghua̍t!

Tng Sènglêng tsìntsū lōetsāi khongkan íāu, tāising to̍h kahná hông tsù tsi̍t tsiam éngoán ê khinsang tse, ē sûisî kàngkē lí hitê kò͘tsi̍p ná tshintshiūⁿ tsio̍hthâu ê púnsèng, kuiê lâng lóng pàngsang lo̍h lâi, tsiū ánne ētàng tsiapsiū pa̍tlâng ê phuephêng kah tsíkàu; jîtshiáⁿ ētàng kámkik tsiahê phuephêng kah tsíkàu. Lí ētàng khòaⁿphòa pa̍tlâng ê hóì, jîtshiáⁿ khaisí ētàng lísèng khòaⁿthāi kakī. Púnlâi ê tsio̍h sim to̍h tsoán tsiâⁿ bah sim, sèngtsêng ē ū tōa tsoánpiàn.

Sòatsiap ê sī, lí sûisî ētàng tsaiiáⁿ tsōe sī siáⁿmi̍h, íki̍p i ê hoānûi tāikhài ū gōa tōa, tse sī lán ê lâsâm púnsèng tī Sènglêng ê sèngkiat púnsèng tùitsiàu tsi hā, sûisî to̍h ē hiánlō͘ tshut lâi ê. Lí m̄bián tsia̍hla̍t, sûisî to̍h ētàng simlāi tsaitsai, liáukái kakī to̍h sī tsōejîn. Ná tshintshiūⁿ tsi̍t tiuⁿ o͘ tsóa, púnlâi m̄tsai kakī ū gōa o͘; tsitmá lâi tsi̍t tiuⁿ pe̍h tsóa, jîtshiáⁿ pâi tsòhóe, o͘sik ê tsóa ê o͘sik to̍h hông kiônglia̍t tshòngkéng tshut lâi, koh khah ántsóaⁿ to bô huattō͘ thesî, bô huattō͘ amkhàm. Tûliáu tiāmtiām'á sêngjīn ígōa, bô siáⁿmi̍h hó piānpok!

Koh tsài sòatsiap, Sènglêng ē ēng pêngan kah hílo̍k thiⁿ móa lí simhing ê thiusiōng khongkan, ūi lán ê lōetsāi khítsō tsi̍tê sûntshùi pêngan kah hílo̍k ê kahn̂g, hō͘ lí pêngan tòa tī hia. Hit tsióng pêngan kah hílo̍k ētàng kóaⁿ tsáu tsin tsē lí ithiòng si̍pkoàn siūⁿ beh ê tshìkik, hò͘ⁿio̍k, kônghuan, koh khah ántsóaⁿ to bô suiàu jīmhô ê siâtsêng suio̍k; mā bô jīmhô ê khongkan thang hō͘ siâtsêng suio̍k tsìnji̍p siuⁿ kú, tio̍hsǹg siâtsêng suio̍k biánkióng beh ji̍plâi tòa koh khah kú, mā tsin kín hông siaubia̍t. Tī Iôhaneh Hokim 14：17, Iésu bat kóng, "Góa lâu lo̍hlâi pêngan hō͘ lín, Góa kā Góa ê pêngan sù hō͘ lín, Góa só͘ sù ê, bô tshintshiūⁿ sèkan lâng só͘ sù ê." Iésu ê ìsù sī kóng, SiōngTsú ê pêngan m̄sī itpuaⁿ sèkan lâng ētàng hō͘ lí ê hit tsióng pêngan, he sī Sènglêng tsiah ētàng hō͘ lí huihoân ê pêngan. Pêngan kìjiân sī ánne, hílo̍k mā kângkhoán.

Góa tsaiiáⁿ, he m̄sī góa ētàng tsò kàu ê, khiok sī Sènglêng tsò ê, oântsoân sī Sènglêng ê konglô, góa m̄ káⁿ kóng hit lāibīn ū góa phahpiàⁿ ê kiatkó, he sûntshùi sī SiōngTsú só͘ sù ê intián!

Itjîtsài-tsàijîsam, tng lán teh beh hoān ke̍k tōa ê tshògō͘, tú tī bûti ê tsōngthài ê tiongkan, tio̍hsǹg kohtsài tōa ê liôngsim mā bô huattō͘ kóaⁿ tsáu lán ê siâtsêng suio̍k ê sî, lāitsū ê Sènglêng to̍h ē sûisî tshaptshiú lâi koánlí lán. I ēng tsi̍t tsióng uihia̍p á sī tshúhua̍t, lâi kiôngpik lí káitsèng, hō͘ lán pībián sánsing puthēng ê hiōkó, tse koh khah sī Sènglêng ê konglô, tsua̍ttùi m̄sī lán ê lêngle̍k ētàng tsò kàu ê. Kílē lâi kóng, lán kah pēbú, hiaⁿtī, pêngiú, khantshiú, kiáⁿjî lóng ū unoàn; puthēng ê lâng, ē inūi ánne suah niásiū ke̍k tōa ê súnsit. Ūtangsî'á, lán to̍h ē sitkhì lísèng, á sī siūⁿ beh pòho̍k tùihong, sīmtsì kahāi tùihong. Tsiahê ke̍ktuan ê hêngûi, ē ūi lán tòa lâi bô huattō͘ mîpó͘ ê sionghāi. Tī iàukín ê kuanthâu, lāitsū ê Sènglêng bē khiā koân suaⁿ khòaⁿ bé sio that, I ē hiòng lí sika aple̍k, á sī kéngkò, á sī khiónghat, hō͘ lí khòaⁿ tio̍h kakī ê bûti kah putgī, siōng bóe pik kah lán hòngkhì siâtsêng suio̍k, hôeho̍k tsèngsiông. Hoân sī tsiahê, lóng m̄sī lán ê konglô, náisī Sènglêng ê sêngtsiū.

Lán sī pînkhò Sènglêng ji̍plâi singkhu tòa liáuāu, hō͘ siâtsêng suio̍k bô koh tī lán ê singkhu lāité huatsing phòhoāi sèng ê kongiōng, lán tsiū ánne pī kingsin, tiôngsin soktsō. Só͘í Kitoktô mā ētàng kah bô sìngióng ê lâng á sī īⁿkàutô͘ kângkhoán, oló kakī ētàng piànsêng sī sèngjîn, hiântsiá, tāitiōnghu; tsísī Kitoktô thongsiông koh khah ētàng bêngpe̍k lōetsāi ê si̍ttsêng, tsaiiáⁿ tsitê sèngjîn, hiântsiá, tāitiōnghu m̄sī lán kakī ētàng tsò tshut lâi ê, khiok sī Sènglêng thè lán tsò tshut lâi ê, liáuāu sêngtsiū tī lán tsiahê putphòe tittio̍h ê tsōejîn ê singkhu téng!

──2014, 07, 06 tah tī "Kitokkàu Thongsìn"
──2017, 09, 22 lio̍k siukái tī Lo̍kkáng