《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 34：Sènglêng lāitsū（éngtsū）honghuat, phiatpō͘
作者 Sòng Te̍klâi 2026.10.25
Tsútê 34：Sènglêng lāitsū（éngtsū）honghuat, phiatpō͘
Tsia só͘ kóng ê lāitsū sī teh tsí "éngtsū" tī singkhu ni̍h lâi kóng.
Tng tsi̍tê lâng sìn Iésu liáuāu, tsíiàu tsitê "sìn" sī "tsin sìn", Sènglêng to̍h ē lâi kàu sìntô͘ ê singkhu téng.
Tsísī, tú khaisí ê lāitsū tōapō͘hūn sī tétsiām ê, Sènglêng tsóng sī khì koh lâi, lâi koh khì. Ūsî koànak lo̍h lâi, hō͘ lán ētàng kóng honggiân, kiâⁿ sînjiah, tit ībāng, tit īsiōng. Ūsî sī tshiongmóa sìntô͘ ê lōetsāi, hō͘ lán tsi̍tsî kámkak kó͘bú, giânhêng ū la̍t, sīmtsì ētàng kakiông kakī ê hóikái hiòngsiān lêngle̍k, tsiongkîbóe ētàng tsin kín thêngtsí kakī ê okhêng. Tsísī, tsiah ê lêngle̍k tī Sènglêng līkhui liáuāu, to̍h koh siausit à, ittēng tio̍h tán kàu Sènglêng koh tsi̍t pái lâilîm ê sî, i tsiah ētàng tiôngsin khioh tńglâi lêngle̍k. Lâilâi-khìkhì ê Sènglêng, pangtsān sìntô͘ kiâⁿ tī sìngióng ê lō͘ ni̍h, kiànkò͘ sìntô͘ kuiê jînsing sìngióng ê kiâⁿkiâⁿ koh thêngthêng ê le̍kthêng. M̄koh, tsiongkîbóe ū tsi̍t kang, Sènglêng lāitsū tī sìntô͘ ê singkhu ni̍h bô koh līkhui, to̍h khaisí sánsing Sènglêng ê lu̍t, ētàng kah “lāu góa” ê tsōe ê lu̍t siotseⁿ, kautsiàn kiklia̍t, siōng bóe Sènglêng ê lu̍t tī sítsōe ê lu̍t, hō͘ tsōe ê lu̍t bô koh tī singkhu ni̍h tsò pháiⁿ, lán tsiongkîbóe páithuat tsōe ê tsòeāu khúnpa̍k, kámkak lán tshingkhì à, ua̍hua̍h khòaⁿkìⁿ hitê tsōeok ê sèkài oánlī; tio̍hsǹg khòaⁿ tio̍h sèkan ê tsōeok kahná tōatsúi kòngkòng lâu, kā tsitê sèkài imbia̍t, m̄koh íking bô huattō͘ ùjiám góa ê sinsim, sèkài ê lâsâm koh khah ántsóaⁿ to bô góa ê hūn ā. Tse to̍h sī Sènglêng lāitsū（éngtsū）liáuāu só͘ tòa lâi ê konghāu, I íking íntshōa góa ētàng pêngan tòa tī énghêng ê pêngan, hílo̍k ê lo̍khn̂g ni̍h à.
Ánne, ántsóaⁿ ētàng hō͘ Sènglêng tùi lâilâi-khìkhì piànsêng éngtsū tī singkhu ni̍h leh? Tsitê pìkuat ittēng tio̍h kiànli̍p tī tùi Sènglêng lāitsū ê "puttoān ǹgbāng" téngbīn, bô í bó͘ tsi̍tkóa Sènglêng ê insù, Sènglêng ê koànak, Sènglêng ê tshiongmóa tòngtsò boántsiok, tsīnle̍k khúnkiû Sènglêng lāitsū tī singkhu ni̍h, sàutû só͘ū singkhu téng, sin lāi ê lâsâm, ittēng ài ta̍tkàu koh khah oântsoân, koh khah sèngkiat ê tēpō͘. Kású ū tsitê ǹgbāng, tsiongkîbóe ū tsi̍t kang, Sènglêng to̍h ē éngtsū tī lí ê singkhu ni̍h, tshōa lí lâi kàu oântsoân sèngkiat, oântsoân tshingkhì ê tēpō͘!
──2014, 07, 05 tī Lo̍kkáng
