《CTT出頭天園地》

I-sap 寓言 6

作者 TLH

6. Sai kap Niáu-tshí
　Ū tsi̍t-pái, tsi̍t-tsiah sai teh khùn, tsi̍t-tsiah niáu-tshí-á peh khí-khì i ê sin-khu tíng, tsáu-lâi tsáu-khì. Sai hōo niáu-tshí-á tshá--tshénn, khí-moo-bái, tsiū iōng tūa tshiú kā niáu-tshí-á hap--lo̍h--khì, tshùi koh khui~khui~khui, siuN7beh kā thun--lo̍h--khì.

　Niáu-tshí-á tūa-siann ai-kiû kóng, “Tāi-ông ah, tsit-pái tshiánn lí gûan-liōng--gúa, lí ê un-tsîng gúa ē íng-úan kì tī sim-kuann lāi. Bô tiānn ū tsi̍t-ji̍t, gúa ē-tàng pò-tap--lí. ” Sai thiann-tio̍h khì ài-tshiò, “Lí tsit-tsiah niáu-tshí-á-póo, ū sím-mi̍h tsâi-tiāu thang pò-tap--gúa leh?” M̄-kú, sai iû-gûan kā niáu-tshí-á pàng--khui, hōo i tsáu.

Kùe bô jūa-kú, sai pu̍ah-lo̍h-khì hām-tsénn. Phah-la̍h ê lâng beh kā u̍ah-lìng-lìng ê sai hiàn hōo kok-ông. In kā sai pa̍k tī tshiū-á-kha, beh khì tshūe tshia lâi tsài. Tsit-tsūn, tú-hó niáu-tshí-á tùi hia kiânn--kùe, khùann-tio̍h sai pi-ai thòng-khóo ê bôo-iūnn, tsiū tsáu kùe khì kā sai sin-khu tíng ê soh-á kā-tn̄g, tsin iāng-khì kā kóng, “Tann, gúa í-king pò-tap lí ê un-tsîng lah.” Niáu-tshí-á tsiū án-ne kā bān-siù-tsi-ông kiù tsáu.

　Tsiáu ē tī thinn-tíng pue, hî ē tī tsúi--ni̍h siû, tōo-ún-á ē tsǹg-thôo, niáu-tshí-á ē óo-khang; lâng kóng, “ Lám-lám-bé mā ū tsi̍t-pōo that.” M̄-thang khùann niáu-tshí-á sè-tsiah koh bô-mi̍h, sió-tsut-á ū sî mā ē piàn ing-hiông!