《CTT出頭天園地》

I-sap 寓言 10

作者 TLH

10. Suann teh Tín-tāng

　Ū tsi̍t-ji̍t, ū lâng tsù-ì tio̍h suann teh tín-tāng, suann-tíng teh tshìng ian. Thóo-tē mā teh phi̍h-phi̍h-tsùn, tshiū-á tn̄g-tsat tó--lo̍h--khì, tūa tsio̍h-thâu lóng lak-lak--lo̍h--lâi. Tāi-ke lóng kám-kak it-tīng sī ū sím-mi̍h khióng-pòo ê tāi-tsì beh huat-sing lah. Sóo-ū ê lâng lóng tsū-tsi̍p tī kāng tsi̍t-ê sóo-tsāi, khùann tàu-té sī sím-mi̍h kùai-mi̍h beh tshut-hiān. In tī hia kho̍k-kho̍k-tán, m̄-kú sím-mi̍h lóng bô tshut-hiān.

　Āu--lâi, ū tsi̍t-tsūn koh khah ki̍k-lia̍t ê tē-tāng, tsi̍t-pîng ê suann li̍h--khui, li̍h tsi̍t-phāng tsin tūa-phāng. Tsûan-pōo ê lâng lóng ba̍k-tsiu kim-kim khùann kàu tūa-tshùi khui-khui. Lōo-búe-tshiú, khùann-tio̍h tsi̍t-tsiah tsiok sè-tsiah ê niáu-tshí-á, sè-ka-lia̍p-á ê thâu tùi hit-ê suann-phāng tshun--tshut--lâi, tùi in tsit-pîng ti̍t-ti̍t tsáu--kùe--lâi.

　Ū lâng huah-kóng, “Siūnn-bē-kàu tsiah-ni̍h sè tsiah ê niáu-tshí-á kìng-jiân ē tsō-sîng suann-pang tē-li̍h!”