《CTT出頭天園地》

I-sap 寓言 15

作者 TLH

15. Sai ê Tsú-tiunn

Ū tsi̍t-ji̍t, sai, hôo-lî, tshâ-lông kap iá-lông tsò-tīn khì phah-la̍h. In tī tsháu-iûnn tíng-bīn tsáu-tsông kui-ji̍t, tsiah lia̍h-tio̍h tsi̍t-tsiah lo̍k-á. In kā lo̍k-á thâi--sí liáu-āu, būn-tûe tio̍h lâi lah. Tsit tsiah lo̍k-á ài án-tsúann pun tsiah ē kong-pênn?

Sai tūa-siann huah kóng, i beh ti̍h tsûan-pōo ê sì-hūn-tsi-it. In tsiū kā hit-tsiah lo̍k-á thiah tsò sì-tè. Sai kiânn-kùe-khì khiā tī lo̍k-á-bah thâu-tsîng beh tsò tshâi-phùann.

I kóng, “Tē-it-ê sì-hūn-tsi-it ài sàng hōo Pah-siù-tsi-ông; tē-jī-ê sì-hūn-tsi-it ài hōo tsò tshâi-phùann--ê; tē-sann-tè sī gúa ê, in-ūi gúa tsham-ka tsit-pái ê phah-la̍h; búe-á tsit-tè, gúa siūnn beh khùann lín sím-mi̍h lâng kánn kā the̍h khì tsia̍h!”

“Hn̍gh!” hôo-lî tsin put-búan kiânn lī-khui. Ná kiânn ná se̍h-se̍h-liām, “Gúan gūan-ì kap lí tsò-tīn phah-piànn, m̄-kú lí bô ìng-kai ka-kī hiáng-siū sîng-kó.”