《CTT出頭天園地》

I-sap 寓言 31

作者 TLH

31. Hôo-lî kap Suann-iûnn

Hôo-lî pháinn-ūn pu̍ah-lo̍h tshim-tsénn, thiàu bē tshut--lâi.

Bô jūa-kú, suann-iûnn tùi hia kiânn--kùe, mn̄g Hôo-lî tī ē-bīn teh tshòng siánn.

“Ooh, lí kiám bô thiann lâng kóng?” Hôo-lî án-ne kā ìn, “Beh khó-hūann lah! Gúa m̄-tsiah ē thiàu-lo̍h-lâi tsia. Tī tsia bián kiann ē bô tsúi. Lí ná m̄ tâng-tsê lâi?”

Suann-iûnn tsim-tsiok khó-lī tsi̍t-ē-á, tsiū thiàu-ji̍p tsénn-lāi. Hôo-lî sûi peh-tsiūnn i ê kha-tsiah-phiann, kha ta̍h i ê tn̂g-kak, tsiū án-ne thiàu-tshut tsénn gūa.

“Tsài-hūe lah! Pîng-iú!” Hôo-lî kóng, “āu-pái ài ē kì--tit, “Tshian-bān m̄-thang siong-sìn lo̍h-lān ê lâng.”