《CTT出頭天園地》

I-sap 寓言 32

作者 TLH

32. Tsng-kha-lâng Kap Tsûa

Tsi̍t-ê tsng-kha-lâng ê kiánn ta̍h-tio̍h tsi̍t-búe tsûa ê búe-liu. Tsûa u̍at-thâu kā kā--lo̍h--khì. In hāu-senn tsiū án-ni sí--khì. Tsò lāu-pē--ê tsi̍t-ē lia̍h-kông--khí--lâi, the̍h i ê póo-thâu khì jiok tsûa, kā tsûa ê búe-liu tok-tiāu tsi̍t-tsat. Tsū hit-sî khí, tsûa khai-sí khì kā tsng-kha-lâng tshī ê tsing-senn, tsò-sîng tsng-kha-lâng tsin-tūa ê sńg-sit.

Tsit-ê tsng-kha-lâng siūnn-kóng án-ne m̄-sī-sè, bô kap tsûa kóng-hô bē iōng--tit. I tsiū tsún-pī tsi̍t-kúa-á tsia̍h--ê kap phang-bi̍t, lâi kàu tsûa ê tsâu-khut, kā tsûa kóng, “Lán lâi kā uan-siû pàng hōo bē kì--tit, hōo-siōng gûan-liōng. Lí kā gúa ê tsing-senn, sī ūi-tio̍h beh pò-siû, in-ūi gúa kā lí ê bùe-liu tok-tn̄g. M̄-kú, lí kā sí gúa ê hāu-senn, gúa pò-siû mā bô siaN2m7-tio̍h! Tann, lán hōo-siōng bô sio-khiàm-tsè, sī án-tsúann lán bē-tàng tsò pîng-iú leh?”

Tsûa kóng, “Bē-tàng! Bē-tàng! Kā lí ê mi̍h-kiānn the̍h--tńg--khì. Lín hāu-senn hōo gúa kā sí ê tāi-tsì, lí bô khó-lîng kā pàng bē kì--tit, tsiū tshin-tshiūnn gúa bē-tàng pàng bē kì-tit gúa ê búe-liu hōo lí tok-tn̄g kāng-khúan.”

Í-king tsō-sîng ê siong-hāi ē-tàng gûan-liōng; m̄-kú, bô khó-lîng pàng bē kì--tit.