《CTT出頭天園地》

Tām-tsúi-hô Lú-sîn..淡水河女神

作者 Tsiúnn Ûi-bûn

Lí kóng lí sī tsúi tsò ê,
你　講　你　是　水　做　ê
Nā bô mā bē tiānn-tiānn lâu ba̍k-sái.
若　無　mā bē tiānn-tiānn 流　目　屎
Gúa kóng lí sī Tām-tsúi-hô lú-sîn,
我　講　你　是　淡　水　河　女　神
Tsù-tiānn ài lâu-kùe Kuan-im-suann,
注　定　ài 流　過　觀　音　山
Ta̍k kang tī hia ūi gúa tshiùnn-kua.
ta̍k kang tī hia 為　我　唱　歌

Nā bô
若　無

Âng-tshiū-nâ ê tsúi-pit-á mā ē koo-tuann.
紅　樹　林　ê　水　筆　仔　mā　會　孤　單

Tshūe bô tsē bangkah ê Ketagalan-lâng.
tshūe　無　坐　bangkah ê Ketagalan　人



Lí nā-sī Tām-tsúi-hô lú-sîn,
你　若　是　淡　水　河　女　神

Gúa tsiū-sī Kuan-im-suann,
我　就　是　觀　音　山

Khùann lí sái-lāng hong kap hōo,
看　你　使　弄　　風　kap　雨

Khùann lí the tī gúa ê hing-khám-tsîng,
看　你　the tī 我　ê　胸　坎　前

Tiām-tiām-á thiann lí ūi gúa tshiùnn-kua.
tiām-tiām-á　聽　你　為　我　唱　歌



Lí nā sī Tām-tsúi-hô lú-sîn,
你　若　是　淡　水　河　女　神

Gúa tsiū sī khe-té ê hî,
我　就　是　溪　底　ê　魚
　Múi tsi̍t-ê tshúan-khùi
每　一　個　喘　氣

Lóng sī lí.
lóng　是　你

Múi tsi̍t-ê tín-tāng
每　一　個　tín-tāng

Mā sī lí.
mā　是　你


--2004/05/10 乎我ê女神