《CTT出頭天園地》

I-sap 寓言 40

作者 TLH

40. Tsúi-ke kap Gû-káng

Tsi̍t-tsiah lāu tsúi-ke tsē tī tsúi-khut-á-pinn teh tuh-ku. Sè-kiánn tūa-kiann sió-kùai tsáu-kùe-lâi kā tâu kóng, “Gúa khùann-tio̍h tsi̍t-tsiah tsiok khó-phà ê tōng-bu̍t, tsiok tūa tsiah, tshin-tshiūnn tsi̍t-la̍p suann hiah-ni̍h tūa. Thâu-khak-tíng huat nn̄g-ki kak. Ū tsi̍t-ki tn̂g búe-liu, kha-tê-á pun-tsò nn̄g-tè.”

“Gōng gín-á, gúa kóng hōo lí thiann. He sī Ông--sian--senn ê gû-káng. I mā bô tshiūnn lí kóng ê hiah-ni̍h tūa, kan-ta pí gúa khah tūa sió-khúa-á nā-tiānn. Tsin kán-tan, gúa mā ū huat-tōo piàn hiah tūa hōo lí khùann.”

Kóng-liáu, i tsiū khai-sí kā pak-tóo kik hōo phòng--khí--lâi, mn̄g in kiánn kóng, “I kiám ū tshiūnn gúa ê pak-tóo tsiah-ni̍h tūa?” “Ū nooh! Pí lí tūa tsiok tsē leh!” Hit tsiah lāu tsúi-ke koh tsài kik, ná kik ná mn̄g, “Án-ne ū kàu tūa--bô?” “Koh khah tūa leh! Koh khah tūa leh!” Lāu tsúi-ke tsiū suh tsi̍t-ē tūa-khùi, koh kik, koh-tsài kik, it-ti̍t kik. I ê sin-khu mā ti̍t-ti̍t phòng-tūa, phòng-tūa, koh phòng-tūa.

“Gúa kánn khak-tīng gû-káng tsu̍at-tùi bô tshiūnn gúa tsit-má tsiah-tūa.” Ūe tú kóng suah, lāu tsúi-ke ê pak-tóo sûi piak--phùa lah.

Phòng-hong tsúi-ke thâi bô bah. Tsū-khua tsū-tūa ê lâng kan-ta ē hāi-sí ka-kī.