《CTT出頭天園地》

I-sap 寓言 46

作者 TLH

46.Hôo-lî Kap Ho̍h

Hôo-lî tī lōo--nih tn̄g--tio̍h Ho̍h, kap i sio-tsioh-mn̄g, tshiūnn hó pîng-iú kāng-khúan.Hôo-lî tshiánn Ho̍h khì in tau tsia̍h-pn̄g, siūnn beh kā tshòng-tī.

Toh-tíng kan-ta 1 ê tshián-tshián ê pûann-á té thng, bô pa̍t-hāng tsia̍h-mi̍h. Hôo-lî khin-khin sang-sang tsiū kā thng sut liáu-liáu, Ho̍h kan-ta ē-tàng kā tshùi-tsiam ùn-tâm nā-tiānn. Ho̍h beh lî-khui ê sî, pak-tóo iáu tsin iau, kap i lâi ê sî-tsūn kāng-khúan.

“Tsin sit-lí! ” Hôo-lî kóng, “ Gúa tsún-pī ê thng, ná-tshiūnn bô ha̍h lí ê kháu-bī.” “Tshiánn lí m̄-thang án-ne kóng,” Ho̍h kóng, “ līng-ji̍t ūann gúa tshiánn lí tsia̍h-pn̄g.”

Kùe nn̄g kang, Hôo-lî lâi kàu Ho̍h in tau. Ho̍h kā àm-tǹg té tī tsi̍t-ki ām-kún tn̂g-tn̂g, tshùi-kháu e̍h-e̍h ê kan-á--ni̍h. Hôo-lî bô huat-tōo kā tshùi-khoo tshun--jip--khì, kan-ta ē-tàng kā kan-á tshùi tsīnn-tsīnn leh.

“ Gúa bô phah-sǹg beh kā lí hūe sit-lé.” Ho̍h kóng, “ Tse sǹg-sī gúa tùi lí ê pò-tap!”

M̄-thang ūi-tio̍h ka-kī tsi̍t-sî ê khùai-lo̍k khì siong-hāi pa̍t-lâng.