《押韻啟應詩篇》

台語押韻啟應詩篇 57

作者 Tīnn Jî-gio̍k

57　　Tāi-pi̍t siám-pī Sò-lô , bih tī tōng-lāi ; hit-sî i tsùe tsit-ê kim ê si ;　　　　　　kau hōo Ga̍k-kuann ; tiāu, sī īng “Bo̍h -tit húi-hūai- -ê .”

1a　Siōng-tè ah , kiû Lí khó-lîn gúa, khó-lîn gúa,
　　上 帝 啊， 求 你 可 憐 我，可 憐 我，

1b　　　Gúa ê sin beh tâu-hioh tī Lí ê pó-hōo-sùann;
　　　　我 的 身 要 投 歇 在 你 的 保 護 傘；

1c　Gúa beh tâu-hioh tī Lí si̍t-kóo ê tì -ìm-ē ,
　　我 要 投 歇 在 你 翅 股 的 致蔭 下，

1d　　　Thìng-hāu tsiah-ê tsai-ē king-kè .
　　　　等 候 諸 些 災 禍 經 過。

2a　Gúa beh kiû-kiò Tsì-kûan ê Siōng-tè ;
　　我 要 求 叫 至 高 的 上 帝；

2b　　　Tsiū-sī kā gúa tshiânn-tî ta̍k-hāng sū ê Siōng-tè .
　　　　就 是 給 我 成 持 逐 項 事 的 上 帝。

3a　Tng hit-ê beh thun-tsia̍h gúa ê lâng, húi-pòng gúa ê sî ,　　
當 彼 個 欲 吞 食 我 的 人， 誹 謗 我 的 時，

3b　　　Siōng-tè beh si-un , tùi thinn kiù gúa thuat-lī ,
　　　　上 帝 將 施 恩，對 天 救 我 脫 離，

3c　Ia̍h beh huat-tshut I ê tsû-ài ,
　　亦 將 發 出 祂 的 慈 愛，

3d　　　Kap I ê sîng-si̍t lâi tû pháinn-tāi.
　　　　及 祂 的 誠 實 來 除 壞 事。

4a　Gúa ê sìnn-miā tī sai ê tiong-kan;
　　我 的 性 命 在 獅 的 中 間；

4b　　　Gúa tó tī tshin-tshiūnn hé to̍h ê sè-kan lâng ê tiong-kan;
　　　　我 倒 在 親 像 火 to̍h 的 世 間 人 的 中 間；

4c　In ê tshùi-khí sī tshiunn sī tsìnn,
　　伊 的 嘴 齒 是 槍 是 箭，

4d　　　In ê tsi̍h sī lāi-to ê to-phìnn.
　　　　伊 的 舌 是 利 刀 的 刀 片。

5a　Siōng-tè ah , gūan Lí kûan-tūa pûann-kè tsiah-ê thinn,
　　上 帝 啊， 願 你 高 大 pûann 過 諸 個 天，

5b　　　Gūan Lí ê îng-kng pûann-kè tsûan-tūe kàu hái-pinn.
　　　　願 你 的 榮 光　pûann 過 全 地 到 海 邊。

6a　In kā gúa ê kha-pōo siat lô-bāng,
　　伊 給 我 的 腳 步 設 羅 網，

6b　　　Ap-tsè gúa ê sim-sîn hōo tsu̍at-bāng.
　　　　壓 制 我 的 心 神 使 絕 望 。

6c　In tī gúa ê bīn-tsîng khui hām-khinn,
　　伊 在 我 的 面 前 開 陷 坑，

6d　　　Ka-kī húan-tńg pu̍ah-lo̍h hit lāi-bīn lè-phùa phīnn.
　　　　自 己 反 轉 跌 落 彼 內 面 裂 破 鼻。

7a　Siōng-tè ah , gúa ê sim tsū-tsāi,　　
上 帝 啊， 我 的 心 自 在，

7b　　　Gúa ê sim tsū-tsāi;
　　　　我 的 心 自 在；

7c　Gúa beh gîm-si ,
　　我 欲 吟 詩，

7d　　　Gúa beh tshiùnn-kua o -ló lí .
　　　　我 欲 唱 歌 讚 美 你。

8a　Gúa ê sîn ah , lí tio̍h tsing-sîn khí--lâi ;
　　我 的 神 啊，你 當 精 神 起 來；
　　Khîm ah , sik ah , lín tio̍h tsing-sîn khí--lâi ;
　　琴 啊， 瑟 啊， 恁 當 精 神 起 來；

8b　　　Gúa pún-sin beh tsin tsá tsing-sîn khí--lâi .
　　　　我 本 身 要 真 早 精 神 起 來。

9a　Tsú ah , gúa beh tī bān peh-sìnn ê tiong-kan kám-siā Lí ;
　　主 啊， 我 要 在 萬 百 姓 的 中 間 感 謝 你；

9b　　　Tī lia̍t-pang ê tiong-kan tshiùnn-kua o -ló Lí .
　　　　在 列 邦 的 中 間 唱 歌 讚 美 你。

10a　In-ūi Lí ê tsû-ài tūa kàu tú-thinn,
　　　因 為 你 的 慈 愛 大 到 抵 天，

10b　　　Lí ê sîng-si̍t kàu kiong-tshong ê sì -pinn.
　　　　　你 的 誠 實 到 穹 蒼 的 四 邊。

11a　Siōng-tè ah , gūan Lí kûan-tūa pûann-kè tsiah-ê thinn;
　　　上 帝 啊， 願 你 高 大 pûann 過 諸 個 天；

11b　　　Gūan Lí ê îng-kng pûann-kè tsûan-tūe kàu hái-pinn.
　　　　　願 你 的 榮 光 pûann 過 全 地 到 海 邊。