《押韻啟應詩篇》

台語押韻啟應詩篇 69a

作者 Tīnn Jî-gio̍k

69　　Tāi-pi̍t ê si , kau hōo Ga̍k-kuann ; tiāu sī īng “Pik-ha̍p-hue” .

1a　Siōng-tè ah , kiû Lí kiù gúa,
　　上 帝 啊， 求 你 救 我，

1b　　　In-ūi tsiah-ê tsúi beh im gúa ê sìnn-miā būe u̍ah.
　　　　因 為 諸 些 水 要 淹 我 的 性 命 不 活 。

2a　Gúa hām-lo̍h tī tshim ê thôo-bê-lāi , bô thang khiā-kha ê sóo-tsāi;
　　我 陷 落 在 深 的 土 泥 內，無 通 khiā腳 的 所 在；

2b　　　Gúa kàu tshim ê tsúi-lāi , tūa-tsúi im-ba̍t gúa tsāi lāi .
　　　　我 到 深 的 水 內，大 水 淹 密 我 在 內。

3a　Gúa in -ūi gúa ê âu-kiò ià-siān kàu beh sí ,
　　我 因 為 我 的 喉 叫 厭 倦 到 要 死，

3b　　　Gúa ê nâ-âu iā ta--khì;
　　　　我 的 嚨 喉 也 乾 去；

3c　Gúa in -ūi thìng-hāu gúa ê Siōng-tè ,
　　我 因 為 等 候 我 的 上 帝，

3d　　　Ba̍k-tsiu iā hue-bê .
　　　　目 珠 也 花 迷。

4a　Bô in-tuann ùan-hūn gúa--ê ,
　　無 因 端 怨 恨 我 者，

4b　　　Khah tsūe gúa ê thâu-mn̂g;
　　　　較 多 我 的 頭 毛；

4c　Lām-sám tsùe gúa ê tùi-ti̍k beh bia̍t gúa--ê ,
　　濫 糝 做 我 的 對 敵 欲 滅 我 的，

4d　　　Put-tsí kiông-bíng ná thih-kǹg;
　　　　不 止 強 猛 若 鐵 鋼；

4e　Liân gúa sóo bô tshiúnn--tio̍h-ê ,
　　連 我 所 無 搶 著 的，

4f　　　Gúa iā tio̍h hîng, tio̍h tshing-sǹg.
　　　　我 也 著 還， 著 清 算。

5a　Siōng-tè ah , gúa ê gû-gōng Lí pún-lâi tsiū tsai;
　　上 帝 啊，我 的 愚 戇 你 本 來 就 知；

5b　　　Gúa ê tsūe-kùa bô ún-mûa tī Lí ê gán-kài.
　　　　我 的 罪 過 無 隱 瞞 在 你 的 眼 界。

6a　Bān-kun ê Tsú Iâ-hô-hua ah ,
　　萬 君 的 主 耶 和 華 啊，

6b　　 Kiû Lí m̄-thang hōo hiah-ê thìng-hāu Lí ê lâng,
求 你 不 通 使 彼 些 等 候 你 的 人，　　　　
　　　　ūi-tio̍h gúa lâi kiàn-siàu;
　　　　為 著 我 來 見 誚；

6c　Í- sik-lia̍t ê Siōng-tè ah ,
　　以色 列 的 上 帝 啊，

6d　　　Kiû Lí m̄-thang hōo hiah-ê tshē Lí ê lâng,
　　　　求 你 不 通 使 彼 些 尋 你 的 人，
　　　　ūi-tio̍h gúa lâi siū lîng-jio̍k ê pit -iàu.
　　　　為 著 我 來 受 凌 辱 的 必 要。

7a　In-ūi gúa ūi-tio̍h Lí ê iân-kòo siū lúe-mē,
　　因為 我 為 著 你 的 原 固 受 詈 罵，

7b　　　Gúa múa-bīn kiàn-siàu tio̍h khut-kē .
　　　　我 滿 面 見 誚 著 屈 下。

8a　Gúa ê hiann-tī khùann gúa tsùe kè -lōo ê lâng,
　　我 的 兄 弟 看 我 做 過 路 的 人，

8b　　　Gúa ê tông-pau khùann gúa tsùe gūa-pang-lâng.
　　　　我 的 同 胞 看 我 做 外 邦 人。

9a　In-ūi gúa ūi-tio̍h Lí ê tshù, sim-lāi tshin-tshiūnn hé to̍h;
　　因 為 我 為 著 你 的 厝， 心 內 親 像 火 to̍h；

9b　　　Koh lúe-mē Lí ê lâng ê lúe-mē, lóng kàu tī gúa tshin-tshiūnn soh.
　　　　又 詈 罵 你 的 人 的 詈 罵，攏 到 在 我 親 像 索。

10a　Gúa lâu ba̍k-sái, īng kìm-tsia̍h khik-khóo gúa ê sim;
　　　我 流 目 屎，用 禁 食 刻 苦 我 的 心；

10b　　　Tse húan-tńg tsùe gúa lîng-jio̍k lâi siong-sim.
　　　　　這 反 轉 做 我 凌 辱 來 傷 心。

11a　Gúa īng mûa-pòo tsùe i- tsiûnn,
　　　我 用 麻 布 做 衣 裳，

11b　　　Lâng tsiū īng gúa tsùe tshiàu-tâm lâi phì-siùnn.
　　　　　人 就 用 我 做 笑 談 來 譬 相。

12a　Tsē tī siânn-mn̂g--ê tâm-lūn gúa;
　　　坐 在 城 門 者 談 論 我；

12b　　　Tsiú-hàn īng gúa tsùe khik.
　　　　　酒 漢 用 我 做 曲。

13a　Tsóng-sī gúa tī tit-tio̍h Lí tsiap-la̍p ê sî ,
　　　總 是 我 在 得 著 你 接 納 的 時，

13b　　　Tùi Iâ-hô-hua Lí kî-tó tsùe tik -ì .
　　　　　對 耶 和 華 你 祈 禱 做 得 意。

13c　Siōng-tè ah , kiû Lí tsiàu Lí tsû-ài ê hong-sīng,
　　　上 帝 啊， 求 你 照 你 慈 愛 的 豐 盛，

13d　　　Tsiàu Lí tsín-kiù ê tsin-si̍t lâi ìn gúa ê khóo-tsîng.
　　　　　照 你 拯 救 的 真 實 來 應 我 的 苦 情。

14a　Kiû Lí kiù gúa tshut thôo-bê- tî ,
　　　求 你 救 我 出 土 泥 池，

14b　　　Hōo gúa bô tîm--lo̍h-khì;
　　　　　使 我 無 沈 落 去；

14c　Kiû Lí kiù gúa thuat-lī ùan-hūn gúa ê lâng,
　　　求 你 救 我 脫 離 怨 恨 我 的 人，

14d　　　Hōo gúa tshut tshim ê tsúi-khang.
　　　　　使 我 出 深 的 水 孔 。

15a　Kiû Lí bo̍h-tit iông-ún tūa-tsúi im-ba̍t gúa;
　　　求 你 莫 得 容 允 大 水 淹 密 我；

15b　　　Bo̍h-tit iông-ún tshim-ian thun gúa;
　　　　　莫 得 容 允 深 淵 吞 我；

　　　　Iā bo̍h-tit iông-ún hām-khinn hām gúa.
　　　　　也 莫 得 容 允 陷 坑 陷 我。

16a　Iâ-hô-hua ah, in-ūi Lí ê tsû-ài sī hó, kiû Lí ìn gúa;
　　　耶 和 華 啊，因為 你 的 慈 愛 是 好，求 你 應 我；

16b　　　Kiû Lí tsiàu Lí tsû-pi ê hong-sīng u̍at-kè-lâi khùann gúa.
　　　　　求 你 照 你 慈 悲 的 豐 盛 越 過 來 看 我。

17a　M̄-thang ng-bīn m̄-khùann Lí ê lôo-po̍k teh kiû u̍ah,
　　　不 通 掩 面 不 看 你 的 奴 僕 在 求 活，

17b　　　In-ūi gúa tī hūan-lān ê tiong-kan ài huah,
　　　　　因 為 我 在 患 難 的 中 間 愛 喝，
　　　　kiû Lí kín-kín lâi ìn gúa.
　　　　　求 你 緊 緊 來 應 我。