《押韻啟應詩篇》

台語押韻啟應詩篇 83

作者 Tīnn Jî-gio̍k

83　　A-sat ê si kua .

1a　Siōng-tè ah , kiû Lí m̄-thang tsīng-tsīng bô siann,
　　上 帝 啊， 求 你 不 通 靜 靜 無 聲，

1b　　　Siōng-tè ah , kiû Lí m̄-thang bô khui-tshùi tiānn-tiānn,
　　　　上 帝 啊，求 你 不 通 無 開 嘴 定 定，
　　　　ia̍h m̄-thang bô tshut-siann;
　　　　亦 不 通 無 出 聲；

2a　In -ūi Lí ê tùi-ti̍k hua-hua-jióng;
　　因 為 你 的 對 敵 嘩 譁 嚷；

2b　　　Ùan-hūn Lí ê lâng kia̍h-khí thâu tsin bíng-ióng.
　　　　怨 恨 你 的 人 舉 起 頭 真 猛 勇。

3a　In īng kan-tsà ê kè-bôo beh hāi Lí ê peh-sìnn bô bāng.
　　伊 用 奸 詐 的 計 謀 要 害 你 的 百 姓 無 望，

3b　　　In sann-kap gī-lūn, beh hāi Lí sóo khǹg-ba̍t ê lâng.
　　　　伊 相 及 議 論，要 害 你 所 藏 密 的 人。

4a　In kóng, lâi--ah, lán lâi bia̍t-bô Siōng-tè tsú-bîn,
　　伊 講 ， 來 啊，咱 來 滅 無 上 帝 子 民，
　　hōo in būe tsiânn kok-bîn,
　　使 伊 不 成 國 民，

4b　　　Hōo Í-sik-lia̍t ê miâ bô koh hōo lâng kì-liām thang tshin-kīn.
　　　　使 以色 列 的 名 無 復 使 人 紀 念 通 親 近。

5a　In tâng-sim sann-kap tsham-siông,
　　伊 同 心 相 及 參 詳，

5b　　　Sann-kap kiat-iok beh tí -ti̍k Lí ê khuan-iông.
　　　　相 及 結 約 要 抵 敵 你 的 寬 容。

6a　Tsiū-sī khiā-khí pòo-pînn ê Í- tong kap Í- si̍t-má-lī-lâng,
　　就 是 居 起 布 棚 的 以 東 及 以 實 瑪 利 人，

6b　　　Môo-ap kap Hā-kah-lâng.
　　　　摩 押 及 夏 甲 人。

7a　Ka-pa-li̍k, A-bûn, kap A-má-li̍k ê peh-sìnn,
　　迦 巴 勒，亞 門，及 亞 瑪 力 的 百 姓，

7b　　　Hui-lī-sū , í- ki̍p Tshui-lô khiā-khí ê peh-sìnn ;
　　　　非 利 士，以及 推 羅 居 起 的 百 姓；

8a　A-su̍t ia̍h kap in liân-ha̍p tshūe kiû-siû,
　　亞 述 亦 及 伊 聯 合 尋 仇 讎，

8b　　　In tsùe Lô-tik ê kiánn-sun ê pang-tshiú.
　　　　伊 做 羅 得 的 子 孫 的 幫 手。

9a　Kiû Lí khúan-thāi in ,
　　求 你 款 待 伊，

9b　　　Tshin-tshiūnn tsá khúan-thāi Bí-tiân án-ni bia̍t in .
　　　　親 像 早 款 待 米 甸 按 呢 滅 伊，

9c　Tshin-tshiūnn tī Ki-sūn-hô ,
　　親 像 在 基 順 河，

9d　　　Khúan-thāi Se-se-lah kap Iâ-pin án-ni bia̍t bô .
　　　　款 待 西 西 拉 及 耶 賓 按 呢 滅 無。

10a　In tī Ún-tô-jínn bia̍t-bô ,
　　　伊 在 隱 多 珥 滅 無，

10b　　　Tsiânn-tsùe tūe-tsiūnn ê pùn-sò .
　　　　　成 做 地 上 的 糞 圾。

11a　Kiû Lí hōo in ê líng-siù tshin-tshiūnn Oo-li̍p kap Se -i-pik bia̍t-ka,
　　　求 你 使 伊 的 領 袖 親 像 俄 立 及 西 伊伯 滅 家，

11b　　　Hōo in ê kun-tiúnn lóng tshin-tshiūnn Se-pa kap Sat-bûn-ná .
　　　　　使 伊 的 軍 長 攏 親 像 西 巴 及 撒 文 拿。

12a　In kóng, lán tio̍h tsiong Siōng-tè khiā-khí ê sóo-tsāi,
　　　伊 講 ， 咱 著 將 上 帝 居 起 的 所 在，

12b　　　Tsiàm lâi tsùe ka-kī ê sóo-tsāi.
　　　　　佔 來 做 自 己 的 所 在。

13a　Gúa ê Siōng-tè ah ,
　　　我 的 上 帝 啊，
　　kiû Lí hōo in tshin-tshiūnn kńg-lê-hong ê tîn-ai ,
　　　求 你 使 伊 親 像 捲 螺 風 的 塵 埃，

13b　　　Tshin-tshiūnn hong-tsîng ê tiū-sap tsin pi-ai .
　　　　　親 像 風 前 的 稻 屑 真 悲 哀。

14a　Tshin-tshiūnn hé sio tshiū-nâ ê siann,
　　　親 像 火 燒 樹 林 的 聲，

14b　　　Tshin-tshiūnn hé-iām sio suann-niá.
　　　　　親 像 火 焰 燒 山 嶺。

15a　Kiû Lí ia̍h tshin-tshiūnn án-ni ,
　　　求 你 亦 親 像 按 呢，
　　 īng Lí ê kông-hong tui-kúann in tsáu-būe-lī ,
　　　用 你 的 狂 風 追 趕 伊 走 不 離，

15b　　　Īng Lí ê tūa-hong hōo in kiann-hiânn bô tē thang khì.
　　　　　用 你 的 大 風 使 伊 驚 惶 無 地 通 去。

16a　Iâ-hô-hua ah, kiû Lí hōo in múa-bīn kiàn-siàu,
　　　耶 和 華 啊，求 你 使 伊 滿 面 見 誚，

16b　　　Thang lâi kî-kiû Lí ê miâ ê su-iàu.
　　　　　通 來 祈 求 你 的 名 的 需 要。

17a　Hōo in íng-úan kiàn-siàu kiann-hiânn;
　　　使 伊 永 遠 見 誚 驚 惶；

17b　　　Hōo in làu-khùi bia̍t-bô tsiū bô siann.
　　　　　使 伊 漏 氣 滅 無 就 無 聲。

18a　Hōo in tsai tsí-ū Lí , miâ tsùe Iâ-hô-hua--ê ,
　　　使 伊 知 只 有 你，名 做 耶 和 華 者，

18b　　　Sī tsûan-tūe-tsiūnn Tsì-kûan--ê .
　　　　　是 全 地 上 至 高 者。