《台語荒漠甘泉（全羅版）》

Tio̍h khí-lâi

作者 陳清俊 翻譯

listen









Sann ge̍h tsa̍p-it ji̍t

"Iâ-hô-hua ê lôo-po̍k Môo-se sí liáu-āu, Iâ-hô-hua huan-hù Lùn ê kiánn Iok-su-a, tsiū-sī kun-sûi Môo-se ê kóng, Gúa ê lôo-po̍k Môo-se sí liáu lah; tann lí tio̍h khí-lâi, kap tsìng peh-sìnn kè tsit ê Iok-tàn, khì Gúa sóo siúnn-sù Í-sik-lia̍t lâng ê tūe." (Iok-su-a 1:1,2)

Tsang lí tú-tio̍h tūa pi-siong thòng-khóo ê sū, hiān-tsāi lí tshù-lāi ná khang-khang. Lí tsiàu kám-tsîng, beh hòng-khì it-tshè, tsu̍at-bāng teh tsē, bô sím-mi̍h gūan-bōng. Lí m̄-thang siū-tio̍h tse iú-hi̍k, in-ūi lí sī tī tsiàn-tàu ê tsiân-sùann, gûi-hiám sûi-sî beh kàu, tiû-tû tia̍p-á-kú iā beh siong-tio̍h Tsú ê kang-tiânn ê tsìn-hîng. Pa̍t-lâng ê sing-u̍ah iā beh in-ūi lí ê tiû-tû siū sún-hāi. Tsit-sî bô-tit thîng teh, liân pi-siong iā sī ke ê.

Tsi̍t ūi tshut-miâ ê tsiong-kun kóng ka-kī tshin-sin tú-tio̍h ê pi-thiànn ê kòo-sū. I ê kiánn sī tsi̍t ūi phàu-ping ùi-kuann, tng ti̍k-jîn huat-tōng kong-kik ê sî, i sī sut-niá tsûan-su tsìn-kong, teh tshiong-kè tsiàn-tiûnn tui-kong ê sî, thu̍t-jiân khùann tio̍h tsi̍t ūi tsiàn-sí ê phàu-ping kun-kuann tó tī hia, i tsi̍t-khùann tsiū tsai sī i ê kiánn. Tsiong-kun pē-kiánn kám-tsîng tshim, tsiàu lí, ing-kai kūi tī kiánn-jî sin-si lâi ai-siong, tsóng-sī tsik-jīm sóo tì, i pit-su kè-sio̍k tsìn-kong. I tsí ū tsim tsi̍t-ē tsiū kín-kín lī-khui, kè-sio̍k tsip-hîng i ê jīm-bū.

Tī hûn-bōng pinn siong-sim tūa khàu, íng-úan būe thang tit hûe í-king sit-khì pó-kùi ê kū thiànn, koh-khah m̄-bián siūnn kóng, tùisiong-sim tit-tio̍h sím-mi̍h tsiok-hok. Pi-siong sóo tsō-sîng ê, sī tshim-tshim ê siong-hûn khik tī siū-siong ê sim, būe būe-kì-tit ê kòo-sū. Tāi-tsì kè-liáu, sim-tsîng bô koh khó-lîng kap í-tsîng siāng-khúan. Nā-sī īng tsiànn-bīn ê thāi-tōo lâi jím-siū pi-siong, m̄-nā hōo lán koh-khah sîng-si̍k, iā ūe tùi pa̍t-lâng koh-khah ū tông-tsîng kap thiànn-sim. Tsin-tsiànn, bô pi-siong, á-sī siū-khóo ê lâng sī tsin khó-lîn. Tī lán thâu-tsîng ê khùai-lo̍k (Hi-pik-lâi 12:2) hōo lán ê pi-siong piàn kng-bîng, tshin-tshiūnn ji̍t-thâu tùi hûn-ni̍h tsiò lo̍h-lâi ê tshàn-lān. Siōng-tè hōo lán tsiàu sóo tiānn-tio̍h ê bo̍k-piau ióng-kám tsìn-hîng, sī tsùe lán siōng tsin, siōng hong-hù ê an-ùi. Nā-sī tsē teh siong-pi, hōo lán ê sim-tsîng ná hām-lo̍h tī koh-khah oo-àm ê kíng-kài, lán ê li̍k-liōng beh ná sit-khì. Sóo-í pàng-hē iu-siong, sìn-khò Siōng-tè ê hoo-tiàu, lán beh koh-khah kng-bîng, lán ê lîng-li̍k koh-khah kiông-tūa. -- J.R. Miller

Tsū-su ūi ka-kī lâu ba̍k-sái,
Kiat-kó sī siū tsūe kap siong-hāi.
Lí sóo ūi gúan tsún-pī ê, sī úi-tāi,
Pí gúan sóo siūnn ê khah si̍t-tsāi.

Pó-pùe îng-iāu ê mi̍h,
Siūnn beh ka-kī tsiàm-iú, beh sit-khì.
Nā-sī khînn-tiâu I ê tshiú, tit tsin-lí,
Tsiàu I ê tsí-ì,
Beh ū pîng-an, tinn-bi̍t ê huann-hí,
Beh ū hí-lo̍k lîng-li̍k ê iû buah lí.
-- Helen Hunt Jackson

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw