《台語荒漠甘泉（全羅版）》

Bô khó-lîng ê gūan-bōng

作者 Tân Tshing-tsùn

listen
Tsa̍p-it ge̍h gōo ji̍t

"Kiám Iâ-hô-hua ū tsùe-būe-lâi ê sū mah?" (Tshòng-sè-kì 18:14)

Tse sī Siōng-tè tùi lí gúa múi-ji̍t thiànn ê thiau-tsiàn. I ài lán siūnn siōng-kûainn siōng-tshim, siōng ū kè-ta̍t ê gūan-bōng, kap lāi-sim ê khat-bōo. I ài lán su-siúnn hiah ê kú-kú lán sóo gūan-bōng, á-sī tshin-lâng sóo gūan-bōng, bô tit-tio̍h hûe-ìng, suah hōo lán hiān-tsāi bô koh teh siūnn, sóo sit-lo̍h ê gūan-bōng. Siōng-tè ài lán siūnn hit ê bat kóng sī khó-lîng, hiān-tsāi suah hòng-khì, jīm-tīng tsit-sì-lâng būe ta̍t-tio̍h ê gūan-bōng.

Hit ê gūan-bōng, nā-sī ha̍p tī Siōng-tè bîng-khak ê tsí-ì, tshin-tshiūnn Siōng-tè tap-ìng A-pik-la̍h-hán kap Sat-la̍h tsi̍t ê kiánn, I tik-khak ūe tsùe. Sī, nā-sī lán gūan-ì hōo I tsùe, I tsiū gūan-ì ūi lán lâi tsùe, sīm-tsì lán tsāi hit khúan ê sū sī ûan-tsûan bô khó-lîng ê, tì-kàu lán beh tshiò hit ê kóng ūe si̍t-hiān ê lâng sī hong-tông, khí-khong-tian.

"Iâ-hô-hua kiám ū oh-tsùe ê sū mah?" Bô, tùi I bô tsi̍t hāng sū sī khùn-lân ê, nā-sī lán tùi I ū kàu-gia̍h ê sìn-sim, I ūe tsiàu I ê tsí-ì kiânn hit ê khùann tsùe bô khó-lîng ê sū. Ká-sú A-pik-la̍h-hán kap Sat-la̍h kè-sio̍k m̄-sìn Siōng-tè ê ūe, in tsiū ūe tsóo-tòng tio̍h Siōng-tè ê kè-ūe.

Î-it ūe hōo "Iâ-hô-hua oh tsùe" ê sū sī lán kòo-ì koh kè-sio̍k put-tūan m̄-sìn I ê thiànn-sim kap lîng-li̍k, koh kū-tsu̍at tsiap-siū I ūi lán tsún-pī ê kè-ūe. Tùi sìn-khò I ê lâng, Iâ-hô-hua bô oh tsùe ê sū. --- tùi "Tsá-khí-sî ê sìn-sit"

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw