《台語荒漠甘泉（全羅版）》

Kî-tó ê hong-sik

作者 陳清俊 翻譯

listen






Gōo ge̍h tsa̍p-sann ji̍t

"in-ūi lán m̄ tsai-iánn tio̍h tsáinn-iūnn kî-tó tsiàu sóo ing-kai ê." (Lô-má 8:26)

Siông-siông Siōng-tè ê tap-hok ín-khí ki-tok-tôo sing-u̍ah-siōng tsin tsūe ê khùn-lân. Kî-tó ài jím-nāi, tsóng-sī I hōo lán tú-tio̍h oh ìng-hù ê lâng, hōo lán ê jím-nāi kàu hān-tōo būe tàng koh jím-siū. In-ūi "hūan-lān sinn-tshut thun-lún." (Lô-má 5:3) Lán ê kî-tó ài ū sūn-ho̍k ê sim. Siōng-tè hōo lán ū khóo-lān, tshin-tshiūnn Tsú Iâ-soo tsi̍t-iūnn, "ia̍h tùi sóo siū tsiah ê khóo-lān lâi o̍h sūn-ho̍k." (Hi-pik-lâi 5:8)

Lán kî-tó ài bô tsū-su. Siōng-tè hōo lán ū hi-sing ê ki-hūe, sing-u̍ah-siōng, ē-hiáu tāi-sing ūi pa̍t-lâng, pàng-hē ka-kī. Lán kî-tó kiû li̍k-liōng, kap khiam-pi, hōo "Sat-tàn ê sù-tsiá lâi phah" (II Ko-lîm-to 12:7) ti̍t-kàu lán tó tī thôo-kha kiò i lī-khui.

Lán beh tshin-tshiūnn I ê ha̍k-sing ê kî-tó kóng, "Ke-thinn gúan ê sìn," (Lōo-ka 17:5) Liáu-āu lán bô tsînn lah, lán ê kiánn-jî phùa-pīnn siong-tiōng, tông-sū bô sió-sim, tāi-ì, hōo kang-tsok tsìn-tōo bān koh lōng-hùi, tsi̍t ê koh tsi̍t ê sin ê tshì-liān khó-giām sùa-tsiap lâi, su-iàu lán pí í-tsîng koh-khah tūa ê sìn-sim.

Lán kî-tó, hi-bōng ū tshin-tshiūnn Ki-tok ê khiam-pi, ná iûnn-ko ê sing-u̍ah. I ài lán tsùe pi-bî ê kang-tsok. Á-sī siū bû-lí ê khòng-kò, khiok bô ki-hūe lâi kái-sueh, in-ūi "i tshin-tshiūnn iûnn-á khan kàu siū-thâi ê tūe, ... bô tshut-siann." (Í-sài-a 53:7)

Lán kî-tó ài un-jiû, má-siōng tú-tio̍h jîn-sing ê hong-pho, in-iū lán siū-khì, tūa-siann kóng pháinn-ūe. Lán kî-kiû ài pîng-an, hut-jiân múi tsi̍t tiâu sîn-king lóng siū ap-li̍k, kín-tiunn kàu ki̍k-tiám, án-ni hōo lán ha̍k-si̍p I sóo sù ê pîng-an sī bô lâng kiáu-jiáu ūe tio̍h.

Lán kî-kiû ài thiànn pa̍t-lâng. Siōng-tè hōo lán sóo tú-tio̍h ê lâng hōo lán tsin oh khì thiànn, lóng sī kóng tsi̍t kúa hōo lí siū-khì siong-sim ê ūe. I án-ni tsùe, sī ài lán bîng-pi̍k "thiànn sī gâu khuan-iông tsû-pi, thiànn sī bô khua-kháu, bô phín-phóng, ... bô khùai siū-khì,... hūan-sū jím-siū, hūan-sū siong-sìn, hūan-sū ǹg-bāng, hūan-sū thun-lún. Thiànn íng-úan būe bô khì." (I Ko-lîm-to 13:4-5, 7-8)

Lán kî-tó ài tshin-tshiūnn Iâ-soo, Siōng-tè ê hûe-tap sī "Gúa thùan-liān lí, ... tī khóo-lān ê hé-lôo-tiong" (Í-sài-a 48:10), "lí ê sim iáu ūe jím-siū mah? lí ê tshiú iáu ūe ū la̍t mah?" (Í-se-kiat 22:14) "Gúa sóo beh lim ê pue, lín ūe lim mah?" (Má-thài 20:22)

Beh tit-tio̍h pîng-an sìng-lī ê hong-huat tsiū-sī tsiap-siū múi tsi̍t tsióng khûan-kíng, múi tsi̍t ê khó-giām, tsiah ê lóng sī ti̍t-tsiap tùi Siōng-tè ê tshiú lâi ê. "kap I tâng tsē tī thinn-ni̍h" (Í-hut-sóo 2:6), tī hûn tíng, tī I ê pó-tsō tsîng, tshiong-múa îng-kng ê ūi ànn lo̍h-lâi khùann lán ê khûan-kíng, sī khó-ài, sîn-sìng lâi tīng ê.

Kî-tó kiû li̍k-liōng,
Liáu-āu jio̍k-thé, sim-lîng lúan-jio̍k sit-siông,
Sóo úa-khò ê thiànn hōo gúa siong-sim, sit-bōng,
Sóo lia̍h-tiâu ê tshiú iā thu̍t-khui, lo̍h khong,
Tng gúa lúan-jio̍k, kiann-hiânn, koo-tuann, bô tsū-tiōng,
Hit ê íng-úan ê tshiú-kut kā gúa hû-tshî, thok-tiōng.

Kî-tó kiû kng-bîng,
Hûn jia ji̍t, bông-bū hōo ge̍h khùann būe tshing,
Thinn tshinn iā àm-tām sok-tsīng,
Liân la̍h-tsik iā sit-khì hāu-lîng,
Tng oo-àm-mî pau-ûi tîng-tîng,
Ki-tok ê bīn tsiò kng oo-àm múi tsi̍t pîng.

Kî-tó kiû hô-pîng,
Ài bô thàng-thiànn hó-khùn, bô tsháu-nāu an-lîng,
Tsóng-sī po̍k-hong ê oo-àm tī thâu-khak tíng,
Tùi-ti̍k kong-kik ná kiông-bíng,
Tng tshinn-kông hong huh-huh-háu, tsiàn-tsing tsìn-hîng,
I siann-im hōo gúa ûan-tsûan pîng-tsīng.

Tsú, gúa kám-siā Lí, ji̍t-ji̍t su-siúnn,
Lí ê tì-hūi bô khùa-ì bî-sùe kî-tó, khún-kiû,
Un-tián tshiau-kè sóo kiû sóo siūnn,
Sù gúa hong-sīng ê lé-mi̍h tsi̍t tūa siunn,
Siúnn-sù-tsiá hûe-ìng múi ê tshíng-kiû,
Pí sóo kiû ê khah hó, bô teh niû.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw