《台語荒漠甘泉（全羅版）》

"Lâng tsùe, Siōng-tè tshiâu"

作者 陳清俊 翻譯

listen







La̍k ge̍h tsa̍p ji̍t

"Koh lán tsai bān hāng sū sann-kap lâi hōo thiànn Siōng-tè ê lâng tit-tio̍h lī-ik, tsiū-sī tsiàu I tiānn-tio̍h ê tsí-ì lâi siū tiàu ê." (Lô-má 8:28)

Pó-lô kóng tsit ê ūe, sī jūa-tsiânn khíng-tīng! I bô kóng “ū-ê sū,” á-sī “tūa pōo-hūn ê sū,” á-sī “huann-hí ê sū,” sī kóng, “bān-sū,” “sóo-ū ê sū”. Tùi siōng sió-khúa ê sū kàu ki̍k-tūa, ki̍k tiōng-iàu ê sū, tùi ji̍t-siông siōng pi-bî ê sū kàu Siōng-tè tī ûi-ki tiong sóo tsìn-hîng ki̍k úi-tāi un-tián ê tūa kang-thîng, lóng sī tī Siōng-tè ê ìng-ún ē.

Tsit ê ūe sī hiān-tsāi-sik, m̄-sī kè-khì ê, iā m̄-sī tsiong-lâi tsiah beh tsùe, Siōng-tè hōo hiān-tsāi ê bān sū tsìn-hîng sī put-tūan ê tsok-gia̍p.

Tùi Sìng-king tsai Siōng-tè sī “gī tshin-tshiūnn ki̍k-kûainn ê suann, phùann-tùan sī tshin-tshiūnn tshim-ian.” (Si-phian 36:6) Tsit-sî thinn-sài teh tsìn-hîng Siōng-tè úi-tāi kè-ūe ê huat-tián, in sìn-sim tshiong-tsiok suan-pòo “Iâ-hô-hua tī I it-tshè sóo kiânn ê, bô m̄ kong-gī, tī I it-tshè sóo tsùe ê, lóng ū tsû-ài.” (Si-phian 145:17)

Jiân-āu tng Siōng-tè tsí-hui “bān sū … hōo lâng tit lī-ik,” he sī Siōng-tè bí-biāu ê phùe-ha̍p. I su-iàu tsin-tsūe bô kâng ê sik-tshái, múi tsi̍t sik, tan-to̍k khùann, khó-lîng bô sím-mi̍h ti̍k-pia̍t, tān-sī ha̍p khí-lâi tiâu-hô tsùe-sîng tshán-lān bí-lē ê tôo-iūnn.

Siá ga̍k-phóo ê sî, su-iàu kok-kò ê im-hō, im-hû, ū-sî bô hia̍p-tiāu. Tsit tâi ki-khì su-iàu tsin-tsūe tan-to̍k ê khí-lûn, pōo-kiānn, tsiap-thâu. Ki-khì ê tsi̍t sió pōo-hūn tan-to̍k ê sî sī bô lōo-īng; tsi̍t im tsi̍t im tī tsi̍t siú kua lāi-bīn khó-lîng bô sánn hó thiann; nā-sī tsiong sóo-ū ê tsíng-ha̍p, tsiap-tsiap ûan-tsûan tsùe tsi̍t thé, tsiū sán-sing ûan-bí, hô-hâi kap pîng-hîng.

Lán tùi tsia o̍h sìn-sim “Gúa sóo tsùe ê, lí hiān-kim m̄ tsai, āu-lâi tsiū ūe hiáu-tit.” (Iok-hān 13:7) --- J.R. Macduff

Tī tsi̍t tshing kiānn ê tshì-liān tiong, m̄-nā ū gōo-pah kiānn sī tùi lí ū lī-ik, sī ū káu-pah káu-tsa̍p káu kiānn koh ka tsi̍t kiānn tùi lí iú-lī. --- George Mueller

Siōng-tè ê ì-sù sī hó (Tshòng-sè-kì 50:20)

Siōng-tè gûan-ì sī hó, --- hok-khì ê pó-tsìng,
Ji̍t-thâu tsiò tī sìnn-miā ê tō-lōo tíng,
Tē-tsiūnn oo-hûn hong-po̍k tú-tio̍h thinn ê kong-îng,
Ji̍t-ji̍t ū tshing-sin, su-sik koh hô-pîng.

M̄-sī ngóo-jiân, bô thiànn hiann-tī tsîng,
Būe Iok-sik kàu gūa-kok tshinn-soo tē-kíng,
Siū tsin tsūe nî ê kan-lân, khóo-hîng,
Tsiah kàu tī Huat-ló ê bīn-tsîng.

Tsi̍t ba̍k khùann-tshut tsìng-lâng ê su-iàu,
Tsioh tio̍h tsi̍t lâng ê kíng-tiàu,
Tùi kann-ga̍k ê khóo-liān o̍h tsâi-tiāu,
Ta̍t kàu úi-tāi îng-iāu ê bo̍k-piāu.

Bô hōo siū kuainn ê lâng tsai,
I siū khóo thàu kàu sim-lāi,
Ba̍k-tsiu tsí tsù-ì bo̍k-tsîng pi-ai,
I ê gán-kong khùann būe-tio̍h tsiong-lâi.

Tn̂g-tn̂g oo-àm thìng-hāu, sìn iáu pó-liû.
I ê sìn-khò kàu bé tit-tio̍h pò-siúnn,
Sî-ki tsi̍t kàu, Siōng-tè tùa I ê po̍k-jîn, pîng-iú,
Khì an-ùi tsìng-lâng, i ê khóo-lān siau-iûnn.

“Sī Siōng-tè, m̄-sī lín tshe gúa lâi.”
Liáu-āu sìng-lī án-ni kiàn-kái.
“Siōng-tè gûan-ì sī hó,” bô kî-thann iōng-ì,
Lâi jiáu-lūan i ê o-ló kua-si.

“Siōng-tè gûan-ì sī hó,” Tshin-ài tsìng-lâng!
Iok-sik ê Siōng-tè sī sio-siâng,
I ê thiànn iông-ún kî-kùai kap khóo-thàng,
I ê tshiú tshūa lán kiânn būe-bat ê lōo-hāng.

Tsú tùi thâu khùann kàu bé,
Ū kóng-būe-tshut thiànn ê bo̍k-tik,
Tshun tshiú bô kiann hē tī I tshiú-ē,
Tit-kàu khùann tio̍h I un-tsû hòng-sik.

Hit sî, lí tī îng-kng ê thinn-ke tùa,
Tùi kè-khì ê it-sing hûe-thâu khùann,
Ba̍k-tsiu khùann sóo sìn-khò kap ín-tshūa,
Beh pò-iông I ê thiànn bô suah.
--- Freda Hanbury Allen

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw