《台語荒漠甘泉（全羅版）》

Tú-tio̍h hūan-lān

作者 陳清俊 翻譯

listen




Tsa̍p-it ge̍h tsa̍p-káu ji̍t

"Lí sī hōo gúan li̍k-kè tsūe-tsūe tūa hūan-lān ê, Lí beh hōo gúan koh-tsài u̍ah." (Si-phian 71:20)

Siōng-tè hōo lí king-li̍k tio̍h "gûi-hiám hūan-lān," ū-sî sī lí ê kàu-io̍k ê tsi̍t pōo-hūn, lí "beh hām-lo̍h tī tūe-ē tshim ê sóo-tsāi" (Si-phian 63:9), king-kè tē-ē thong-tō, tó tī sí-lâng tiong-kan, tsóng-sī lí kap Siōng-tè ê kau-thong, liân-lo̍k bô kàu tn̂g ê tē-pōo. Kàu-bé I beh hōo lí tùi tē-ē "koh-u̍ah."

Íng bô hûai-gî Siōng-tè! Bo̍h-tit kóng I pàng-sat lí, būe-kì-tit lí, á-sī bô tông-tsîng lí. I beh "hōo lí koh-u̍ah," put-kúan lōo-tôo sī khi-khu uan-khiau, lóng ūe ū pînn-pînn ti̍t-ti̍t ê tsi̍t-tūann. Siōng tn̂g ê ji̍t iā ū ji̍t-lo̍h ê sî, Tang-thinn ê seh tsûn tsin tn̂g iā ū iûnn-ûan ê sî.

Ài kian-tīng put-î, kian-kòo bô iô-tsuah, "in-ūi tsai lín tī Tsú tio̍h-bûa ê m̄-sī khang-khang." (I Ko-lîm-to 15:58) I ūe u̍at-tńg-sin lâi an-ùi lí. Tng I án-ni tsùe, lí ê sim suah m̄-tsai beh án-tsúann kám-siā tshiùnn-kua o-ló I, tshin-tshiūnn si-jîn kóng, "Gúa ê tsi̍h beh tūa-siann gîm-si o-ló Lí ê gī." (Si-phian 51:14)

Hōo lo̍h, hong tshe,
Hân-líng tang-thinn tē,
Oo-hûn ná lâi ná tsūe,
Hio̍h la̍k, ju̍ah-thinn kè.

Ba̍k-tsiu tsù-sîn hong-thai-thinn,
Sim pîng-tsīng ná ju̍ah-thinn-sî,
Gūan-ì tsiap-siū Tsú sóo si,
Put-kúan sī sím-mi̍h.

Tng kám-kak líng, tsiū kóng "I siúnn-sù,"
Tsai I ê hong tshe tùa lâi hó-tshù,
Sóo khiàm-īng I kiòng-ìng bô tiu-tû,
Sui líng-hong tshe, sim-läi iáu un-lúan kú-kú.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw