《台語荒漠甘泉（全羅版）》

"U̍ah-tsúi"

作者 陳清俊 翻譯

listen


Káu ge̍h jī-sann (Káu ge̍h jī-tsa̍p-sann ji̍t)

"Sìn gúa ê lâng, tshin-tshiūnn sìng-king sóo kóng, ū u̍ah tsúi ê khue, beh tùi i ê pak-lāi lâu-tshut." (Iok-hān 7:38)

Lán tiong-kan ū lâng siūnn bô, ūi-sím-mi̍h sìng-lîng bô tshiong-múa lán ah. Būn-tê sī lán í-king tit tsin tsūe, iā bô the̍h tshut-lâi pun hōo lâng. Nā-sī lí gūan-ì tsiong sóo-tit ê hok-khì pun lâng, hōo sìnn-miā ū khah tūa ê sū-hōng, tsiânn-tsùe lí tsiu-ûi lâng ê hok-khì, án-ni, tsin kín lí ūe huat-hiān sìng-lîng kap lí tsùe-hé. I ūe sù-hok lí ê sū-hōng kang-tsok. I ūe sìn-jīm lí sù-hok lí, lí ūe tsiong tsiah ê pe̍h-pe̍h pun hōo lâng.

Bô ū sím-mi̍h im-ga̍k pí hong-khiā-khîm sóo huat-tshut ê siann hiah hó thiann, he sī tsi̍t ê bí-lē tsū-jiân hiān-siōng. Tī lîng-sìng sing-u̍ah tiong iā ū lūi-sū ê tsîng-hîng. Hong-khiā-khîm put-kò sī tsi̍t ê tsiàu hô-im tshng tsin tsūe tiâu hiân ê tshâ-siunn, thìng-hāu tshe-lâi ê hong īng khùann būe-tio̍h ê tshiú-tsáinn tûann tshut-lâi ê siann. Khong-tiong ê hoo-khip king-kè khîm ê hiân ê sî, tsiū huat-tshut tshin-tshiūnn thinn-tíng ê im-ga̍k tī khong-tiong kiōng-bîng, ná tshin-tshiūnn ū tsi̍t tūi ê thinn-sài si-pan lâi-lâi khì-khì teh tûann hiah ê hiân tsi̍t puann.

Siâng-khúan, lán khui lán ê sim hōo Sìng-lîng lâi tûann sim-hiân, hōo I tûann-tshut I sóo ài ê kua-tiāu. Lán an-tsīng tī Siōng-tè sìng-kang ê lōo-tsiūnn thìng-hāu. --- tùi "Tī tē ná tī thinn"

Sù-tôo tit-tio̍h "Sìng Sîn tshiong-múa," (Sù-tôo Hîng-tūan 2:4) in bô lâu tī sóo tsoo-īng ê lâu-koh pâng-king khui-hūe thó-lūn, in kàu gūa-bīn suan-iông hok-im. --- Will Huff

"Pe̍h-pe̍h tit-tio̍h, pe̍h-pe̍h pun lâng." Hōo lán sóo-ū ê, kóng,
Lán lāi-bīn ê lîng kiám sī sí-bông?
Thài-ūe thiann-būe-tio̍h iau-gō ê hoo-kiò hiān-siōng.
Tsú ê huih ūi in lâu, lâi súe tshòng-siong,
Tsú ê thé phah-phùa hōo in tsùe mī-pau iōng,
Lán kiám thang ka-kī to̍k-tit to̍k-hióng! --- Tūatsú-kàu William Alexander

Lí ê sió-tī A-pik tī tah-lo̍h? (Tshòng-sè-kì 4:9)


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw