《台語荒漠甘泉（全羅版）》

Khóo-lān tiong ê an-tsīng

作者 陳清俊 翻譯

listen

Tsa̍p-it ge̍h tshue-sì (Tsa̍p-it ge̍h sì ji̍t)

"gúa tī Ka-pa-lôo ê hô-pinn, siū-lia̍h ê lâng ê tiong-kan; hit-sî thinn khui. Gúa khùann-kìnn Siōng-tè ê īnn-siōng. ... Iâ-hô-hua ê tshiú hē tī i ê sin-tsiūnn." (Í-se-kiat 1:1-3)

Bô ū sím-mi̍h sî pí "siū-lia̍h" ê sî ê sìng-king ūe-gú khah pó-kùi. Si-phian án-ni kóng, "gúan bat tsē tī Pá-pí-lûn ê hô-pinn," (Si-phian 137:1) kám-khài ê si-kua. Iā khùann tio̍h Tsú tshūa gúan tùi siū-lia̍h tiong kiù tshut-lâi ê hí-lo̍k, "Iâ-hô-hua tshūa hiah ê siū-lia̍h ê lâng tò-tńg lâi, ... tshin-tshiūnn lâm-hng ê khue-tsúi koh lâu." (Si-phian 126:1, 4)

Bat king-li̍k kè tūa khùn-khóo ê lâng, tsiū tsin oh tsiong i kap sìng-king pun-khui. Tsāi pa̍t-lâng khùann sìng-king kap kî-thann ê tsu bô sím-mi̍h hun-pia̍t, tsāi i khùann, tsiū tsûan-jiân ê bô siâng. Tng i ba̍k-sái tih tī sìng-king sóo siá ê king-li̍k ji̍t-kì, hiah ê jī tsí-ū i khùann ūe tio̍h, thong-kè tsiah ê jī-ia̍h, i hûe kàu Siōng-tè tiān-īnn ê thiāu-á, "kàu Í-lîm, tī-hia ū ... tsúi-tsûann, ... tsó-tshiū." (Tshut-ai-ki̍p-kì 15:27) Múi ki thiāu, múi tsâng tshiū, tùi i lóng-sī i sìnn-miā tiōng-iàu sî-kî ê kì-ik.

Siūnn tio̍h lán siū-lia̍h ūe tit hó-tshù, lán ài tsiap-siū tsit ê tsîng-sè, tsīn-liōng lī-iōng i. Ūi tio̍h lán sit-lo̍h á-sī tùi lán sin-tsiūnn tshiúnn khì ê mi̍h hûan-ló, pīng būe kái-siān lán ê tshù-kíng, húan-tńg ūe tsóo-tsí lán kái-siān sóo tshun ê mi̍h. Lán ná tsing-tsat, khún-tînn tī lán ām-kún ê soh tsiū ná ân.

Siâng-khúan, phî-khì bái ê bé siūnn beh ka-kī tsing-thuat bé-soh, tsí ūe tsiong ka-kī lik-sí. Ū-la̍t ê tsing-sinn siūnn beh tsūann-lo̍h ām-kún ê kê, tsí ūe siong tio̍h ka-kī ê king-kah. Lâng-lâng lóng tsai tsa̍p-pueh sè-kí Ing-kok bo̍k-su kiam tsok-ka, Laurence Sterne, ê phì-jū. Kóng, tsi̍t-tsiah pe̍h-thâu-khok-á kap tsi̍t-tsiah kim-si-tshiok siū kuainn tī lông-á lāi. Pe̍h-thâu-khok-á tsing-tsat beh pe tshut-khì, tsiū siong tio̍h i ê si̍t, iáu-sī kuainn teh huah kóng "gúa būe-tàng tshut-khì, gúa būe-tàng tshut-khì." Kim-si-tshiok an-tsīng khiā tī tshâ tíng, tshiùnn kua, pí tī gūa-bīn tsū-iû pe ê hûn-tshiok sóo tshiùnn ê kua khah hó thiann.

Tsai-lān lîm-kàu lán, pīng bô it-tīng sī bái, thê-tshínn lán ūe má-siōng jia̍t-jia̍t ǹg Siōng-tè kî-tó. Tūa-hōo tiong tī tshiū kha bih hōo, bô it-tīng ūe khùann-tio̍h tsúi-kó tī tshiū-tíng. Lán tsáu ǹg Siōng-tè, tī I ê si̍t-ē pì-ìm, tī hia lóng ūe tshē tio̍h koh-khah tsūe sóo m̄-bat khùann-kè, m̄-tsai ê mi̍h-kiānn.

Siōng-tè tsiah-tio̍h khó-giām kap khóo-lān tsiong I sin ê khé-sī sù hōo lán. Tshin-tshiūnn Ngá-kok, lán ài hûainn-kè "Nga-po̍k ê tōo-thâu" tsiah ūe kàu Piān-í-lī, (Tshòng-sè-kì 32:22, 32) tī hia i kap Tsú sio-ián, iā siū I tsiok-hok, thang khua-kháu kóng, "Gúa tng thâu tùi-bīn kìnn-tio̍h Siōng-tè, gúa ê sìnn-miā iáu tit-tio̍h pó-tsûan." (Tshòng-sè-kì 32:30) Tsiong tsit ê kòo-sū piàn-tsùe lí ê king-li̍k, tshin-ài siū-lia̍h ê lâng, Siōng-tè ūe hōo lí "mî-sî tshiùnn-kua," (Iok-pik-kì 35:10) iā ūe hōo lí ê "sí-ìm piàn-tsùe tsá-khí-sî." (A-môo-sū 5:8) --- Nathaniel William Taylor

Sūn-ho̍k Siōng-tè ê sìng tsí-ì, tsiū ū siōng nńg ê tsím-thâu thang khùa, an-bîn.

Gúa ê sìnn-miā, gúa ê pâng-king,
Tshiong-múa khùann būe-tio̍h ê kong-îng.
Hōo gúa tī hùn-tàu tiong tìn-tsīng,
Hōo gúa sim tī tang-thinn iáu tshinn-ling-ling,
Tng po̍k-hong-hōo sàu tī tsiu-ûi khûan-kíng,
Ìng-ún ê tsiáu iáu tshiùnn-kua tī tshiū tíng.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw