《台語荒漠甘泉（全羅版）》

"Ià-siān"

作者 陳清俊 翻譯

listen

Tsa̍p-jī ge̍h jī-sann (Tsa̍p-jī ge̍h jī-tsa̍p-sann ji̍t)

"Khí-lâi tsia̍h ah, in-ūi lōo tsin hn̄g; lí kiânn bô huat-tit. " (I Lia̍t-ông-kì 19:7)

Siōng-tè án-tsúann tùi-thāi ià-siān ê lô-po̍k Í-lī-a? I hōo i khùn, koh hōo i tsia̍h. Í-lī-a tsùe tsin tsūe tāi-tsì, "tī A-hap ê thâu-tsîng tsáu kàu Iâ-su-lia̍t ê siânn-mn̂g." (I Lia̍t-ông-kì 18:46) In-ūi i tsáu tsin tsūe lōo, īng liáu tsin tsūe thé-la̍t, suah hōo i sit-tsì, ì-tsì siau-tîm lo̍h khì. Tī tsit tsióng tsîng-hîng hā, lâng sī su-iàu hioh-khùn, sin-thé su-iàu tiâu-ióng, Í-lī-a ê sin-thé iā-sī án-ni.

Ū tsin tsūe úi-tāi ê lâng, in lóng kap Í-lī-a ū siâng-khúan ê tsîng-hîng, īng khì-liáu tsin tsūe thé-la̍t, "kàu tsi̍t tsâng lô-tîng-tshiū kha," (I Lia̍t-ông-kì 19:4) tsiū ì-tsì siau-tîm. Tsú ê ūe tsin an-ùi lâi kóng, "khí-lâi tsia̍h ah, lōo-tôo iáu tsin hn̄g." Ūann ūe kóng, "Gúa beh hōo lí hue-hok thé-la̍t."

Lán m̄-thang tsiong sin-thé ê ià-siān kap sim-lîng ê lúan-jio̍k khùann tsùe siâng-khúan lâi tùi-thāi.

Gúa ià-siān būe tàng sìn-khò, būe tàng kî-tó,
Thé-la̍t īng kè-thâu, suah pu̍ah-tó,
Tsi̍t-hāng gúa siūnn beh tsò,
Tsiū-sī pàng-hē it-tshè khì bîn-tshn̂g tó.

Lí siūnn Siōng-tè ūe gûan-liōng?
Gúa tshin-tshiūnn inn-á khùn an-siông,
I bô mn̄g gúa sī-m̄-sī ū li̍k-liōng,
Thái-ūe liân úa-khò kî-tó iā bô iōng?

Tshin-ài ê, Siōng-tè ūe gûan-liōng mah? Siūnn khùann-māi.
Tī lí iáu būe-hiáu kóng-ūe ê sî-tāi,
Lí ê lāu-bú kiám m̄-sī án-ni kā lí khúan-thāi,
Á-sī tsiong lí phō tī I sim-hûai?

Lí bô kiû, I kiám hōo lí khiàm-īng,
I kiám hōo I ê kiánn tsùe būe-lâi ê sū-tsîng?
Á-sī tsiong lí un-jiû phō tī I hing-tsîng,
Kòo-siú lí an-bîn, pîng-tsīng.

Lāu-bú ê thiànn-sim hōo I ū tsâi-tiāu,
Tsai inn-á bô ì-sik ê su-iàu,
Tī lí siān kàu liân sìn-khò kî-tó iā būe-hiáu,
Tng lí kè-thâu īng thé-la̍t oh uan-khiau.

Pàng-hē it-tshè, an-hioh lâi,
Tshin-tshiūnn an-siông tī lāu-bú hûai-lāi,
Tsú tsai it-tshè, tshin-ài ê Tsú liáu-kái,
Ná inn-á khùn kah lóng m̄-tsai.

M̄-bián mn̄g ē-sái á būe-sái,
I tsai I ê kiánn-jî siān kàu kî-tó būe lâi,
I bô īng tshut-siann kî-tó tsùe kuat-sài,
I bîng-pi̍k sím-mi̍h sî lí su-iàu jîn-ài.

I tsai lí ūe kî-tó, ūe sìn-khò,
Tsai lúan-jio̍k sin-thé tùi thôo tsō,
Ah, Ki-tok hô-tíng ê kuan-hûai koh khó-khò,
Tī pùann-mî lâi kā ha̍k-sing so.

I tùi in kóng, an-sim khùn,
Tú sī tī I siū tsûan jîn-lūi ê tsūe tînn-khún
Tsiong lí ê sìnn-miā kau-thok I siōng an-ún,
M̄-bián kiann, an-sim hó-khùn pîng-sūn.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw