《台語荒漠甘泉（全羅版）》

"Tik-sìng kàu ū tshun"

作者 陳清俊 翻譯

listen


Tsiann ge̍h tsa̍p-sann (It ge̍h tsa̍p-sann ji̍t)

"Húan-tńg tī tsiah ê lóng-tsóng ê sū, lán tùi thiànn lán ê, tik-sìng kàu ū tshun." (Lô-má 8:37)

Lán ê sìng-lī m̄-nā sī sìng-lī, sī sìng-lī kàu ū tshun, m̄-nā bô sit-pāi, bô siū tsâu-bia̍t, húan-tńg húi-bia̍t ti̍k-jîn, tshiúnn tio̍h tsūe-tsūe ê tsiàn-lī-phín. Lán án-tsúann ūe “tik-sìng kàu ū tshun? Sī tùi tī sio̍k lîng ê tshau-liān, lâi ka-kiông sìn-sim, kiàn-li̍p sim-lîng ê sìng-keh. Lîng-sìng ê kiàn-li̍p su-iàu king-li̍k tshì-liān. Tshì-liān ná kông-hong, tshe ǹg kûan-suann ê tsîng-pik tshiū, hōo tsiah ê tūa tshiū ūe tī tē-ni̍h tìng-kun tshim-tshim-tshim. Lán lîng-sìng ê tsing-tsiàn sī siōng kî-biāu ê tsiok-hok, sī lī-iōng hit ê tshì-thàm lâng ê môo-kúi lâi hùn-liān lán, tsiong i thiat-té phah pāi. Tī sió A-se-a Hū-lí-ga lâng (Phrygians of Asia Minor) ū tsi̍t tsióng thûan-suat, in tsing-ho̍k tùi-ti̍k liáu-āu, tsiū ūe tsiong tùi-hong ê khùi-la̍t khip-siu tī ka-kī ê sin-tsiūnn, ūe tsing-ka ka-kī ê li̍k-liōng kap ióng-khì. Sū-si̍t siōng, tùi tshì-liān khah iânn iā sī thang tsing-ka lán ê sio̍k-lîng ê li̍k-liōng kap tsok-tsiàn ê tsong-pī. Lán m̄-nā thang phah iânn tùi-ti̍k, koh thang tsiong tùi-ti̍k lia̍h khí-lâi, piàn-tsùe kap lán tâng kok ê, tsùe-hé tshut-tsiàn.

Sian-ti Í-sài-a kóng “beh ǹg sai pe--khì, phah tī Hui-lī-sū lâng ê king-thâu-tíng,” (Í-sài-a 11:14) Hui-lī-sū lâng sī Í-sik-lia̍t ê sí tùi-thâu. Tsit ê king-bûn sī kóng, Í-sik-lia̍t lâng m̄-nā thang tsing-ho̍k Hui-lī-sū lâng, koh beh khiâ tī in ê king-thâu-tíng, tit koh-khah tsūe ê sìng-lī. Ū king-giām ê tsúi-siú, ūe hiáu tsìnn-hong sái tsûn, lī-iōng uat-lâi uat-khì ǹg gi̍k-kíng tsìn-tsîng. Lán ê lîng-miā, khò Siōng-tè ê un-tián, tī khùann sī siōng put-lī, siōng bô hó ê khûan-kíng tiong, iā ūe piàn kè-lâi tsùe lán ê lōo-īng. Thang tūa siann kóng, “gúa sóo tú-tio̍h tāi-tsì tú-tú sī hōo hok-im khah tsìn-pōo;” (Hui-li̍p-pí 1:12) --- tùi “Hong-sīng ê u̍ah-miā”

Kóo-tsá ê kiânn-tsûn-lâng, siong-sìn hái ni̍h ê san-ôo khí tshiûnn-ûi sī beh pó-hōo lāi-bīn ê sing-bu̍t. Kho-ha̍k-ka kuan-tshat liáu huat-hiān tsit ê siūnn-huat m̄-tio̍h. Húan-tńg san-ôo su-iàu pho-lōng ê íng, kânn tio̍h tsūe-tsūe ê íng-khì tsiah ūe sing-tsûn, tsiah ūe sinn-thùann. Sè-kan ê sìng-jîn, úi-jîn, in king-li̍k ê sing-u̍ah iā sī king-kè tsūe-tsūe khùn-lân, tsiah pûe-ióng tshut in ê sìng-keh, thang tam-jīm, sîng-siū tūa tāi-tsì.

“Kám-siā Siōng-tè, siông-siông tī Ki-tok tik-sìng, lâi tsùe-thâu tshūa gúan, iā īng gúan tī ta̍k sóo-tsāi hián-bîng hit ê tùi bat Ki-tok tsiah ū ê khì-bī.” (II Ko-lîm-to 2:14)

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw