《台語荒漠甘泉（全羅版）》

Khóo-lān tiong ū pîng-an

作者 陳清俊 翻譯

listen


Tsa̍p-jī ge̍h sann ji̍t

"Lí pîng-an mah? lí ê tiōng-hu pîng-an mah? gín-ná pîng-an mah? I kóng, Pîng-an." (II Lia̍t-ông-kì 4:26)

Gúa ê lîng! Tio̍h kian-kiông khí-lâi!
Sóo thiànn ê lâng kiânn-ji̍p tiùnn-ûi lāi,
Lí ê Siōng-tè án-ni an-pâi.
Tio̍h kian-kiông khí-lâi!

Gúa ê lîng! Tio̍h kian-kiông khiā-teh!
Sí-bông tsāi bōng. Thiann lí ê Siōng-tè,
Khùann ah, I beh tshūa lí an-jiân king-kè.
Tio̍h kian-kiông khiā-teh!

Gúa ê thài-thài kap gúa sing-u̍ah la̍k-tsa̍p-jī nî koh gōo ge̍h-ji̍t kú, hiān-tsāi gúa káu-tsa̍p-jī hè, i sing lī-khui gúa khì. Tng gúa tī pâng-king kiânn-lâi kiânn-khì ê sî, gúa ǹg íng-u̍ah ê Iâ-soo kóng, "Tsú Iâ-soo, tsí tshun gúa tsi̍t lâng, tān-sī gúa bô koo-tuann, in-ūi Lí kap gúa tùa, koh sī gúa ê pîng-iú. Tsú ah, tshiánn an-ùi gúa, hōo gúa li̍k-liōng, tsiong Lí jīm-ûi gúa su-iàu ê mi̍h sù hōo Lí khó-lîn ê lôo-po̍k."

Lán ê sim bô búan-tsiok, tû-hui lán ta̍t-kàu tsit ê tē-pōo, tsai Tsú Iâ-soo sī lán íng-úan, íng-u̍ah ê pîng-iú, I put-tūan tī ta̍k ê tsîng-hîng ē, sûi-sî tsún-pī tsìng-bîng I pún-sin sī lán ê pîng-iú. --- George Mueller

Khóo-lān būe siong-tio̍h lán, tng lán īng un-jiû lâi tùi-hù.

Tshiū-tíng ê ping-seh kā tshiū-ki teh kàu beh tn̄g-khì tsi̍t-iūnn. Siâng-khúan, gúa khùann-kìnn tsin tsūe lâng teh tī khóo-lān ê tiong-kan. Tsóng-sī gúa iā siông-siông khùann-tio̍h lâng tī khóo-lān tiong tshiùnn-kua, hit-sî gúa ūi in ūi gúa lâi kám-siā Siōng-tè. Bô ū sím-mi̍h kua-siann ūe pí tī àm-mî tshiùnn khah hó thiann. Ū tsi̍t ê hū-jîn ê kòo-sū, i ê to̍k-sinn ê kiánn sí, i giâ-ba̍k ǹg-thinn, ū thinn-sài ê bīn hiòng i kóng, "Gúa ê kiann ah, gúa tsiong hí-lo̍k hōo lí." Tsit kù kán-tan ê ūe, siông-siông tī gúa ê sim kóo-lē gúa, an-ùi gúa. --- Henry Ward Beetser

Sí bô hōo gúa ê lîng iu-siong, siong-hāi,
Sí būe íng-úan pun-lī sóo-tsāi,
Kiám m̄-tsai, mûi-kùi hue pûann-kè tshiûnn tī hitpîng khai,
Sí khak-si̍t sī ún-tsông, m̄-sī íng-úan keh-kài.
Lí tī Ki-tok ê līng-gūa sè-kài,
Lí kap Ki-tok tông-tsāi, Ki-tok kap gúa tông-tsāi;
Lán liân-ha̍p tsùe tsi̍t-thé tī Ki-tok lāi.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw