《台語荒漠甘泉（全羅版）》

"Tit si̍t-kóo pe kuâinn"

作者 陳清俊 翻譯

listen

Sann ge̍h tshue-káu (Sann ge̍h káu ji̍t)

"Tuì....tíng-bīn khuànn-lo̍h-lâi." (Ngá-ko 4:8)

Ki-tok-tôo pē tuā ê tāng-tànn, khiok hōo in ū nn̄g-ki si̍t. Thiann tio̍h, ná tsin mâu-tún, tse khiok sī sīu tsiok-hok ê tsin-lí. Tāi-pi̍t sīu tio̍h tuā khó-giām ê sî, án-ni âu-kiò kóng, "Guān guá tit-tio̍h si̍t, tshin-tshīunn kap, guá tsīu pe khì, tit-tio̍h an-jiân khiā-khí." (Si-phian 55:6) Jiân-āu, tī i bi̍k-sióng uân ê tsìn-tsîng, i ná tit-tio̍h khak-sìn i beh ū si̍t-kóo ê guān-bōng í-king ta̍t-tio̍h, sóo-í suà tsiap lo̍h-khì kóng, "Tio̍h tsiong lí ê tànn sià hōo Iâ-hô-hua; I beh hû-tshî lí, I íng-íng bô hōo gī-lâng iô-tsuah." (Si-phian 55:22)
"Tāng-tànn" tī guá ê sìng-king tsù-kái ni̍h kái-sueh tsuè "Iâ-hô-hua sóo hōo lí ê". Sìng-jîn ê tànn sī Siōng-tè sóo hōo i ê, sóo-í khò sìn-sim tsīu uē kî-tsik-sìng piàn-tsuè tsi̍t tuì si̍t. Sim sīu tāng-tāng ap-li̍k ê lâng "beh tshin-tshīunn ing-tsiáu thí-si̍t pe-kuâinn." (Í-sài-a 40:31) -- tuì "Tsú-ji̍t-o̍h sî-pò"

Tsi̍t ji̍t kiânn tī kue-ni̍h,
Kip teh pān-sū, thâu-nóo sīunn pah-hāng tāi-tsì,
Ná ba̍t-hûn, tuā-hōo beh piànn lo̍h-khì,
Ka-kī khó-lîn ka-kī.
Khó-lîn ê,
Tāi-tsì hiah tsuē,
Sing-ua̍h hiah pháinn kè,
Tāng-tànn teh tī sim-té.
Thài-iông ná lia̍t-hé,
Khì-tshia phùn oo-ian sái kè,
La-pah, siann-im tsi̍t sì-kuè,
Thôo-hún tò-tshù pe.
Tsing-sîn sīu gi̍k-thāi buē liáu,
Sim ià-siān, tshau-huân, khùn-jiáu,
Si̍t-tsāi tòng buē tiâu.

Ah! Kan-khóo buē-uân buē-suah,
Ap-li̍k si̍t-tsāi siunn tuā,
An-uì ka-kī mā bô khah tsua̍h,
Bû-nāi lâi tsiap-sīu tse sing-ua̍h.
Tsit-sî, ū suè-suè siann thiann-kìnn:
"He sī beh thê-sing lí, m̄-sī ap-tsè lí,"
Guá tsiah tsai, sīunn-huat ū siang-bīn,
Guá bô teh tī tāng-tànn ê ē-bīn,
Sī tī i tíng-bīn,
Tāng-tànn m̄-sī kiò guá pē,
Sī hōo guá tsē.
I ê kè-uē,
Tsai guá lîng-li̍k buē-uē,
Su-iàu un-tián kap li̍k-liōng,
Ná tshīu su-iàu ji̍t-kngg, kam-lōo lâi sîng-tióng,
Iā ná buē tsiânn-hîng ê ióng,
Tuì Tsin-sîn bô kàu-gia̍h ê sìn-gióng,
I ê tsû-ài tsān guá lîng tsiām-tsiām ióng.

Nā-sī tó-tī tāng-tànn ē, tsīu sí-bông,
Nā-sī lóo-li̍k khiā khí-lâi ê, uē sìnn-miā hing-ōng,
Tāng-tànn piàn-tsuè lán ê siang si̍t,
Thê-sing lán tiàm tī I ê un-tián tsin-si̍t.
Nā bô i, lán íng-uán tī tshián-sìn ê sî-ji̍t.

Oh! Thinn ê ò-biāu thong-ta̍t,
Beh teh lán ê tāng-tànn sī tsuè thê-sing lán ê khuì-la̍t,
Guá ê lîng ah! sing-kuâinn, sing-kuâinn ū kè-ta̍t,
M̄-thang tī tāng-tànn ē, teh siong-pi,
Siōng-tè ê uē-gú sī ji̍p thian-thui ê só-sî,
Kap Ki-tok tan-to̍k tsuè-hé khiā-khí,
Tsē tī tāng-tànn tíng-bīn, hioh tī I sin-pinn. -- Mary Butterfield

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw