《台語荒漠甘泉（全羅版）》

"Kan-lân tiong o-ló"

作者 陳清俊 翻譯

listen
Sann ge̍h jī-sann (Sann ge̍h jī-tsa̍p-sann ji̍t)

"In īng kau-tsiàn ê sî sóo tshíunn ê mi̍h, tshú i lâi hiàn, thang siu-tsíng Iâ-hô-hua ê tiān." (I Li̍k-tāi-tsì-lio̍k 26:27)

Tē tshim ê sóo-tsāi, tsûn-tsāi ū tsin-tuā bu̍t-tsit ê li̍k-liōng, tshin-tshīunn muî-khòng. Thôo-thuànn (muî) sī kóo-tsá tshīu-nâ sīu ko-un kap ap-li̍k sóo sán-sing. Siāng-khuán, lîng-sìng ê li̍k-liōng iā sī tsûn-tī sìnn-miā ê tshim-tshù, sī tuì sóo sīu, sóo buē thang liáu-kái ê thòng-khóo lâi sán-sing ê.
Ū tsi̍t-ji̍t lán beh liáu-kái, tī khó-giām tiong sóo tit ê tsiàn-lī-phín, sī beh īng tsuè pang-tsān kî-thann tâng-kiânn thinn-lōo ê tâng-phuānn, sìng-lī lâi kàu thinn-siânn. Ài-tsai, pang-tsān lâng ê hong-huat pit-su tuì sīu-khóo tik-sìng ê king-li̍k khì ha̍k-si̍p. Nā-sī tsí-ū ai-thàn, huat uàn-giân, thòo tuā-khuì, tuì sím-mi̍h lâng lóng bô lōo-īng.
Pó-lô kàu ta̍k sóo-tsāi sóo thuân ê sī sìng-lī ê o-ló, m̄-sī sí-sit ê iu-siong. I sīu ê khóo-lān ná tsuē, i ê sìn-khò ná tshim, huann-hí iā ná tuā. I kóng, "Tsīu nā īng lín ê sìn tsuè tsè-mi̍h lâi ho̍k-sāi, guá tsuè kuàn-tiān tī hit tíng-bīn, guá sī huann-hí, iā kap lín tsìng lâng sann-kap huann-hí." (Hui-li̍p-pí 2:17) Tsú ah, pang-tsān guá tī kin-á-ji̍t tuì sóo huat-sing tī guá ê it-tshè ê sū tit-tio̍h li̍k-liōng. --- tuì "Tī tē ná tī thinn"

I khǹg guá tī lông-á-lāi,
Lī-khui hue-hn̂g hn̄g-hn̄g ê sóo-tsāi,
Tsóng-sī guá beh tshut siōng suí ê kua-siann,
In-uī I tsiong guá hē tī hia.
Guá bô beh īng si̍t lâi tsing lông-á hōo I pháinn,
Nā-sī tī lông-á-lāi sī Tsō-bu̍t-tsú sóo ì-ài,
Tsóng-sī guá ê kua-siann beh ta̍t-kàu thinn,
Ná tshìunn, im-liōng ná ke-thinn.

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw