《台語荒漠甘泉（全羅版）》

"Thiànn ūe jia-khàm lóng-tsóng ê kè-sit"

作者 陳清俊 翻譯

listen

La̍k ge̍h jī-jī (La̍k ge̍h jī-tsa̍p-jī ji̍t)

"Jîn-ài ūe jia-khàm lóng-tsóng ê kè-sit." (Tsim-giân 10:12)"Tio̍h kiû jîn-ài." (I Ko-lîm-to 14:1) [tsham-khó I Ko-lîm-to 13:7-13]

Hûan-ló ê sî, tsiong khùn-lân kap Siōng-tè pun-thuann (hun-tam). Tsùe-kūn ū tha̍k tio̍h tsi̍t ūi Siōng-tè ê kiánn-jî ê kò-jîn king-giām, hōo gúa ìn-siōng tsin tshim, tsin lo̍k-ì kap tāi-ke hun-hióng.
"Tī pùann-mî gúa huat-kiàn ka-kī ûan-tsûan khùn būe khì, in-ūi bô kong-tō ê sū, tsi̍t-tsūn tsi̍t-tsūn kong-kik gúa, gúa ê sim put-ti put-kak sit-khì thiànn ê jia-khàm. Gúa tsin thòng-khóo hiòng Siōng-tè âu-kiò, kiû I sù li̍k-liōng hōo gúa ūe tsun-thàn I ê kà-sī, 'Jîn-ài ūe jia-khàm lóng-tsóng ê kè-sit.'
Sìng-lîng má-siōng khai-sí hōo gúa ū li̍k-liōng, tsùe-āu tsān gúa būe-kì-tit it-tshè. Gúa sióng-siōng ku̍t tsi̍t ê hûn-bōng, tsiong thôo óo khí-lâi, óo kàu tsin tshim, gúa tsiong sóo-ū ê siong-sim, thòng-khóo ê sū lóng tâi tī lāi-bīn, kín-kín tsiong thôo khàm khí-lâi, tī tíng-bīn tsìng tsháu, kap pe̍h-sik mûi-kùi hue, koh ‘m̄-thang būe-kì-tit gúa' ê hue, tsiū lī-khui.
Hut-jiân-kan, gúa ûan-tsûan an-tsīng hó-khùn, tī gúa sim-lāi tshim-tshim ê siong-jiah kìng-jiân ûan-tsûan hó, liân tsi̍t-tiám-á hûn-jiah iā bô khùann. Siōng-tè ê thiànn jia-khàm kàu tsiah thiat-té, kin-á-ji̍t gúa kìng-jiân lóng būe-kì-tit sī sím-mi̍h siong-sim, put-pîng ê sū lah.”

Suann-pinn ū tsi̍t tsūa lia̍h-hûn iánn,
Sī bû-tsîng hong-hōo tsō-tsiânn,
Tshim-tshim hong-bōo khàm-kau,
Hûainn-kè tshinn-tshinn súi-súi ê tsáu-phiânn,

Sî-kan kè, Tsí-siông tùi ē-kha huat-khí,
Tsháu-á tshinn-thai múa tshim-khinn,
Ū hue, ū tîn, ū sin ínn,
Pí í-king koh-khah hó kíng-tì.

Un-jiû ê sim siū siong,
Sìnn-miā ê khùai-lo̍k sit-tsong,
Thiànn ê sìn-jīm ū khóo-tiong,
Iu-siong ji̍t-tsí bān-bān tsìng-siông.

Sî-kan king-kè, thinn khui,
Thinn-sài tsiong io̍h-ko kôo tī khang-tshùi,
Sim lāi ê thiànn koh-khah tshiong-múa,
Hue-hok í-tsîng ê an-lîng, siū an-ùi.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw